Споминали поету «Краіны Лагідности»

Закінчыла ся ХІ едиция Гарасиміяды, цикличной подіі дедикуваной поеті Єжы Гарасимовичови, якій міцно інспірувал ся Карпатами, особливо Лемковином. Подія прошла в днях 6. і 7. вересня/септембра 2019 r. на обшыри ґміны Команча.

Першый ден Гарасиміяды прошол в самій Команчы. Традицийні імпрезу вюл Мєчыслав Чытайло, а зобраных привитал і війт місцевой ґміны – др Роман Бздик. Запрошены прелеґенты приближыли присутным творчіст і жытя Гарасимовича. Іх выступліня попереджены были доповідю Дануты Наґужаньской-Ґал, бывшой директоркы Ґмінного Осередка Культуры в Команчы, про історию 70-літньой Публичной Бібліотекы в Команчы та про концепцию і початкы Гарасиміяды.

Мария Костельняк в своій прелекциі прібувала довести, што Гарасимович є духовым вітцьом гірской, туристичной співанкы, з чого самы вандруючы по горах не здают собі справы. Дале, проф. Альюа Вольдан з Віденьского Університету, якій перекладат поезию Гарасимовича до німецкого языка та занимат ся перекладами інчых языків, аналізувал тлумачыня Ігоря Калинця на украіньскій язык. Наконец, Роберт Ксєнжопольскій, дохтор по професиі і любитель позеиі Гарасимовича, оповіл про факты з жытя поеты.

По науковій части публика Гарасиміяды могла пообзерати театральне представліня зрыхтуване учениками Основной Школы в Новым Лупкові, пак выслухати концертів ґрупы Арете і Пава Оркіша.

Другій ден свята Гарасимовича зачал ся од зложыня квітя при памятнику поеты, якій находит ся на Выжній Перегыбі, де запрошены гості і школяре прочытали вершы Гарасимовича. Пан ґрупа рушыла на Ветлиньску Полонину, жебы, вертаючы через село Миків, зложыти дальше квітя. В тым селі находит ся наступный памятник дедикуваный Гарасимовичови. Поміщено го перед хыжом, в котрій бывал поета. Тепер можут хоснувати го туристы. Райд закінчыл празднуваня ХІ едициі Гарасиміяды.

Орґанізаторами подіі были: Стоваришыня для Розвитку Лупкова і Околиц, Уряд Ґміны Команча та Ґмінный Осередок Культуры в Команчы, фінансову підпору дал Маршалківскій Уряд в Ряшові.

фот. ҐОК Команча