«Спомний собі Лемку» – Параскєва Бреян про жытя на Лемковині – віторок, 21.00 год.

В попередніх одтинках проґраму мали сме змогу почути оповіданя Параскєвы Бреян про выізд до Росиі в 1940 р., щестливий поворот в 1942 р. на Лемковину, та про ляґєр Явожно і його взязнів. Днес, вернеме до жытя на Лемковині сперед ганебоного 1947 рока. Зосередиме ся на періоді ІІ Світовой Войны, дознаме ся хто і коли копал в Ізбах окопы, а тіж як выглядало жытя селян вчас воєнных операций.

Параска Бреян (з д. Фрицка), котра народила ся в 1924 р., спомне тіж про поворот до православя, котрий мал місце на переломі 20. і 30. років ХХ віку. Товды же цілы Ізбы вєдно з о. Димитрийом Хыляком рішыли побудувати нову церков – православну часовню, в котрій в 1946 р., станула під вінці з каваліром з рідного села – дознаме ся пару деталів про традицийне лемківскє весіля. При нагоді спомне тіж про особу ізбяньского пароха, Міністра Внутрішніх Справ Руской Народной Республикы Лемків – о. Хыляка, котрого в тым році обходиме 150. річницю народжыня та 60. смерти.

За тыма мотузками (част І і част ІІ) можете прочытати спомины Параскєвы Бреян, котры остали списаны Анном Рыджанич, а пак печатаны в Православным Перегляді.

«Спомний собі Лемку» то проґрам, в котрым можете почути цікавы річы про минуле, про рідну Лемковину, але і жытя на чужыні. Інтервю ведены молодым чловеком, дают надію старшым його бесідникам на ліпше заран для лемківского народу.