Стрічы Русинів в ЗША

В найблизшым часі Русины жыючы в ЗША будут мати неєдну нагоду, жебы стіртити ся з інчыма Русинами, познати дакус свою історию, традицию і культуру, або вказати ся, як меншына, інчым.

2. жолтня/октобра русиньскє становиско буде присутне на 100. річниці істнуваня Музею Штукы в Клівленд. 100 років назад, коли Музей ся сотворил, єст часом еміґраций тисячів Русинів з Галичыны до ЗША, м.ін. власні до міста Клівленд. Карпаторусиньскє Общество в ЗША, одділ орґанізациі в Клівленд, подає, же при іхнім становиску, окрем вельох інформаций про Русинів, буде мож видіти выставу, або взяти участ в деякых забавовых і родинных активностях.

• 2.10.2016 р., 11.00 год., The Cleveland Museum of Art, 11150 East Blvd, Cleveland 44106

О тыжден, 8. жолтня/октобра, будут дальшы дві стрічы. Перша буде проходила в Ашвіль і будут то кулінарны варштаты, інструктором єст Андреа Робель. Варштаты заплянуваны сут на дві части. Вчас першых, 8. жолтня/октобра буде мож ся навчыты печы оріховы і маковы булкы, а вчас другых, 12. грудня/децембра, печены будут традицийны різдвяны кісточка.

• 8.10.2016 р., 9.00 год., Asheville, NC, ibconline@gmail.com

Кому єднак не в голові печыня, то 8. жолтня/октобра мож выбрати ся на прелекцию проф. П.Р. Маґочія пн. Карпаторусины – міты і стереотипы. Професор буде розповідал про еволюцию достоменности, од минулости по сучасніст, той власні ґрупы Славян, яка жыє в Середній Европі, четвертой попри Росиянах, Білорусинах і Украінцях східньославяньской нациі. На стрічы буде мож тіж придбати сой книжкы проф. Маґочія про історию Карпатской Руси і Карпаторусинів. Стріча буде проходила в Мюнголь в штаті Пенсильванія.

• 8.10.2016 р., 14.00 год., Carpatho-Rusyn Cultural Center, 915 Dickson St, Munhall, Pennsylvania 15120

22. жолтня/октобра в Вількс-Бари (ПА), одбуде ся 4. Ґенеалоґічна Русиньска Конференция пн. Зрозуміти русиньску спадковину.

• 22.10.2016 р., 8.30 год., King’s College, Campus Center, 3rd Floor, 133 N. River St., Wilkes-Barre, PA, 18711

Остатньом з подій, якы будут проходити в жолтни в ЗША, єст спільне свяктуваня Русинів в Юньонтавн, 30. жолтня/октобра, на котрым, по літургіі, буде мож пообзерати выступ фольклорной ґрупы Славяне, попрібувати стравы з русиньской кухні і, очывидно – зінтеґрувати ся з інчыма.
Вшыткы дрібниці з адресами і інчыма поміщаме на портали.

• 30.10.2016 р., 9.00 год., St. John the Baptist Byzantine Catholic Church Parish Social Hall, 201 E. Main St., Uniontown, PA, 15401

Дрібниці найдете за тым мотузком.