Сумар дня 19. квітня/апріля 2024 р

Приносиме вам сумар медияльной ґрупы ЛЕМ.фм+ на ден 19. квітня/апріля 2024 р.

Рушыла модернізация желізницьовых стаций леніі Крениця – Тарнів

В минулым місяци зачали ся роботы в рамках проєкту перебудовы 13 желізницьовых стаций і пристанків медже Тарновом і Креницьом. Кошт інвестиций то в сумі 73 млн злотых. Працы тырвают уж м.ін. в Андриівці і Тухові. В рамках робіт будут выремонтуваны пероны, вымінены торы і тракцийна сіт. При тым утримуваный єст желізничный рух. Модернізация має тыкати і пристанків в такых місцевостях як Мушына, Милик, Жеґєстів, Зубрик, Верхомля Велика, Рытро ци Старый Санч. Рушыли уж рыхтуючы працы, обнимаючы ґеолоґінчы, ґеотехнічны і ґеодезийны досліджыня. Інвестициі сут реализуваны в рамках «Урядового проґраму будовы або модернізациі желізницьовых пристанків на рокы 2021-2025». Вшыткы змодернізуваны обєкты будут выпосажены в нове задашыня, лавкы, інформацийны таблиці і ознакуваня. Для неполносправных подорожуючых будут побудуваны похыльні. З думком о невидячых і планно видячых передвиджено дотыковы стежкы і остерігаючы пасы.

Пряшів, Новый Санч і Ряшів хотят обновити Via Regalis

Як інформує Пресове одділіня Пряшівского Самосправного Краю, Крайскій Музей в Пряшові вступує до проєкту Via Regalis – Середньовічне споіня Пряшова з польскыма містами в рамках вызвы Проґраму Interreg Польща – Словация 2021-2027. ПСК передаст на проєкт близко 20 тис. евро, 80 тис. партнеры достанут з Европейского фонду реґіонального розвитку. Основном ідейом проєкту, котрого партнерами сут Округовый Музей в Новым Санчы і Округовый Музей в Ряшові, є бывше істнуваня Via Regalis – кральовской обхідной пути. Пут лучыла міста од Пряшова через Сабинів, Стару Любовню, Спишску Стару Вес, Старый Санч, Новый Санч аж до Кракова. Як інформує ПСК, «активности проєкту поможут шырити освіту, знаня, інформациі і проглубити знаня соспільной культурной дідовизны і ремесел, котры были на обхідній пути цінены цілы столітя». В рамках проєкту Крайскым Музейом в Пряшові зрыхтуваны будут выстава і творчы варштаты о середньовчній пути, котру пак буде мож видіти і Польщы. Окрем того зреализує ся середньовічный ярмак в Палаци Ракочія. Більше на тему проєкту прочытате в дописі на нашым портали.

Русиньскій Ден в Празі

Заран, в суботу 20. квітня/апріля в Празі одбуде ся Русиньскій Ден. На подію просят Общество Приятелів Лужыці і Общество Приятелів Підкарпатской Руси. Подія пройде в історичній пражскій будовли з XVIII столітя, котра служыла лужыцкым Сербам як Сербска семінария, а днес має назву Лужыцка семінария. В рамках подіі буде мож м.ін. выслухати рефераты істориків і культурных діячів з Чешской Республикы, Словациі і Підкарпатя, рыхтує ся і панельова дискусия на такы темы як істория Русинів і Підкарпатской Руси, культура і література, русиньскій язык і його розвиток і кодифікация, ци істория чехословацкой штатной справы за Першой Республикы. Буде ся бесідувало і о сучасности Русинів та русиньскых орґанізациях в Чешскій Республиці і на світі. Театр Viola з Пряшова одпрезентує сценічне пасмо Шепоты – істория русиньской співачкы Анці Ябуровой. Запрезентуваны будут звыкы і традицийна русиньска кухня.

«Етнокультура? Беру участ!»

Містно-Ґмінна Публича Бібліотека в Польковицях зреализує новый проєкт пн. «Етнокультура? Беру участ!». На тоту ціль бібліотека отримала 113 тис. злотых в проґрамі Нацийонального Центра Культуры: «ЕтноПольща. Едиция 2024». Першы подіі одбудут ся в маю. То м.ін. варшататы, стрічы і вельо інчых діянь, вказуючых культурове богатство реґіону.