Сумар дня 21. квітня/апріля 2023 р.

Приносиме вам сумар медияльной ґрупы ЛЕМ.фм+ на ден 21. квітня/апріля 2023 р.

Русины боронили своіх прав перед Венецийском Комісийом

Вчера, 20. квітня/апріля одбыли ся консультациі Венецийской Комісиі з представниками нацийональных меншын, котры жыют на Украіні. Запрошыня достал і Світовый Конґрес Русинів. За Русинів в стрічы брали участ председа СКР Штефан Лявинец, Петро Медвідь і Мілян Піліп. Конґрес в грудни/децембрі минулого рока звернул ся писмом до словацкого премєра Едуарда Геґера, в котрым жадал безодкладне заставліня пересекуций Русинів на Украіні. Писмо отримала і предсідателька Европейской Комісиі Урсуля фон дер Ляєн. В одповіди рекомендувала Русинам звернути ся з тым проблемом до Венецийской Комісиі. Русины выступили перед Комісийом з пятьома головныма жаданями – м.ін. вызнати карпатьскых Русинів за окремый нарід і автохтонну нацийональну меншыну на Украіні, признати ім вшыткы права в згоді з медженародныма догвярінями ци дати в списуваню жытелів на Украіні можніст офіцияльно ідентифікувати ся як карпатскій Русин. Представникы Венецийской Комісиі по дискусиі ствердили, же не сут компетентны рішыти тоты проблемы. Рекомендували Русинам звернути ся до Рады Европы. Як подал председа СКР такой в найблизшых днях прирыхтує ся писмо до Рады Европы, в котрым Русины зас будут жадати стрічу і рішыня проблемів, якы мают на Украіні.

«Од Русаль до Яна» одбуде ся в ограниченій формі

Як поінформувал Музей Лемківской Культуры в Зындрановій, тогорічне свято лемківской культуры «Од Русаль до Яна» не отримало дотациі Заряду Підкарпатского Воєвідства в конкурсі «Культуральный меценат». В звязку з тым подія одбуде ся в послідню неділю липця/юлия – значыт 30., в міцно ограниченій формі. Орґазнізувана музейом каждого рока подія мала дотля богатый проґрам, в якым ся находило м.ін звиджаня музею, промоция книжок на карпатскы темы, презентациі фотоґрафій і фільмів, выставы, показы народного ремесла, конкурсы і музичны выступы русиньскых і другых локальных ансамблів. О тогорічных проблемах музею, в звязку зо зменшыньом міністерияльных дотаций на підметову діяльніст і цільовы задачы, інформували сме уж на початку того рока, коли то Музей был закрытый на зимовый сезон з причыны браку середків на фунґуваня на дотеперішніх условіях. Музей находил ся в подібній ситуациі уж перше. Кєд іде о свято «Од Русаль до Яна», музей зрезиґнувал з його орґанізациі в 2018 р., внескуючы передати грошы на фінансуваня імпрезы на діяльніст інтитуциі, жебы могло нормальні фунґувати. Подія вернула влони по долшій перерві, спричыненій не лем пандемійом, але як раз браком державного фінансуваня.

Стріча з лемківскыма джазовыма музиками

Днес в Ополи пройде стріча з лемківскыма джазовыма музиками – Мареком і Ґошом Тутко, в рамках циклю меджекультуровых стріч «Меншыны в діалоґу», орґанізуваных Документацийно-Выставенничым Центром Німців в Польщы. Запрошены гості оповідят м.ін., як видят своє місце і значыня в польскым соспільстві, а і поділят ся свойом музиком – лемківскым пісням Марек і Ґоша надают сучасный, джазовый аранж. Модератором стрічы буде Зузанна Геруд – Полномічна Заряду Опольского Воєвіства до справ Вельокультуровости.

Джерело фотоґрафіі: www.zyndranowa.org