Сумар дня 26. квітня/апріля 2023 р.

Приносиме вам сумар медияльной ґрупы ЛЕМ.фм+ на ден 26. квітня/апріля 2023 р.

Войско на дорогах

В минулу пятницю зачало ся парудньове войскове школіня на обшыри підкарпатского воєвідства пн. «Медвід 23». В звязку з тым при даякых мостах находят ся знакы войсковой клясифікациі обтяжыня – передала 18. Змеханізувана Дивізия. Односят ся они лем до войсковых поіздів – то стандардовый систем НАТО, в котрым мостовый обєкт має приділеный номер з окрисліньом максимального обтяжыня. Войско припоминат тіж, што протягом тых днів жолніры і техніка Желізной Дивізиі будут ся переміщати по державных дорогах реґіону. В школіню берут участ і підодділы зо Словениі і Румуніі – разом то пару тисячів войсковых.

Духнович для Духновича

В нaйблизшу пятницю 28. квітня/апріля Театр ім. Александра Дихновича вкаже на своій головній сцені премєровый спектакль пн. «Головный тарабанщык (бубнар)». Пєса, якой ориґінальный текст написал як раз Духнович, была зрыхтувана з нагоды 220. річниці народин будителя Русинів, по котрым і пряшівскій театр взял мено. Хоц Духнович пєсу написал іщы в 1852 році, то темы, якы в ней піднимат, не тратят на актуальности – то здобываня становиска, статусу в неуцтивый і нечестный спосіб, то любов медже двоіма молодыма людми, темы так стары як людство, ци квестия пошаны для родичів, што є моральным наказом без огляду на епоху, так само як рівноправніст каждого чловека, каждой нациі – є то фурт незавершене діло. Пєсу вырежысерувал Станіслав Білый, текст до сучасного русиньского языка перетлумачыл Петро Медвід, якій одповідат і за драматурґічну роботу, а в головных ролях мож буде видіти: Василя Русиняка, Зузану Ковальчыкову, Владиміра Рогача, Юзефа Ткача і Мартіна Оравеца.

Колысочці 10 років!

Обчаньскє Здружыня Колысочка, русиньска орґанізация, котра в своій діяльности зосереджат ся головні на наймолодшых хоснувателях русиньского языка, буде неодолга празднувала 10. річницю свого істнуваня. Торжества заплянували на 12. мая. В проґрамі сут чысленны выступы предовшыткым школярів – учеників русиньского языка, а тіж м.ін. співочы выступы Ганкы Сервіцкой і Мариянны Железной. В проґрамі подіі є очывидно і презентация діяльности орґанізациі за рокы єй фунґуваня – представит єй Люба Кральова, котра веде орґанізацию, а так само є і директорком Музею Русиньской Культуры в Пряшові. Головном активністю Обчаньского Здружыня Колысочка є орґанізация вечерніх шкіл русиньского языка для діти і дорослых. Окрем того Колысочка реґулярні печатат книжкы і підручникы, часопис для русиньскых діти пн. «Колысочка», а тіж платні зо співанками, в тым выдала єдну платню з драматизуваном приповідком. Торжество 10-літя Колысочкы пройде 12. мая на великій сцені Театру А. Духновича в Пряшові.

Новосільскій тым разом в Познані

Архієпархіяльный Музей в Познані прилучат ся до празднувань 100. річниці народин Юрия Новосільского і орґанізує выставу пн. «Ікона і абстракция. Аванґарда і традиция». Вернісаж пройде 27. квітня/апріля. Презентуваны на выставі іконы походят з краківской православной церкви, вроцлавской грекокатолицкой катедры та з римокатолицкых осередків – Аббатства Бенедиктинів в Тынци і парохіі Божого Провидіня спільноты Chemin Neuf в Варшаві. Выставу буде мож обзерати до 16. жолтня/октобра в Ґалериі Сучасной Штукы Академіі Любраньского в Познані.