Сумар дня на 02. мая 2022 р.

Приносиме вам сумар медияльной групы ЛЕМ.фм+ на ден 02. мая 2022 р.

Одбыли ся центральны упамятніня в 75. річницю Акциі «Вісла»

В минулу суботу, 30. квітня/апріля, одбыли ся споминовы подіі в 75. річницю Акциі «Вісла». До спільнотовых упамятнінь просили вєдно Стоваришыня Лемків і Стоваришыня «Руска Бурса» в Ґорлицях. Першым пунктом в проґрамі было одданя чести жертвам лаґру працы в Явожні при лемківскым місци памяти. Пак в церкви св. Михала в неістнуючым по выселінях селі Білична вызвучала великодня молитва за вшыткы жертвы выгнаня. Участны переіхали пак до Устя Руского і зложыли квітя під памятником в центрі села. Центральны упамятніня завершыла стріча в просторах Руской Бурсы в Ґорлицях.

То іщы не конец споминовых акций

Подіі, якы прошли 30. квітня/апріля, то не конец упамятнінь 75. річниці выгнаня. Річницьовы акценты являт ся і на дальшых лемківскых подіях. Споминовы акциі будут проходити і вчас ХІ Медженародного Бієнале Лемківской/Русиньской Культуры в Креници (20.-21. мая) і на XLII Лемківскій Ватрі на Чужыні в Михалові (5.-6. серпня/авґуста). Выселіня з 1947 р. буде упамятняла і Тогорічна ХХХ Лемківска Творча Осін (8.-9. жолтня/октобра), яка пройде в Білянці і в Рускій Бурсі в Ґорлицях. В плянах є і взновити выданя книжкы «А Вісла дале плыне» Петра Мурянкы, а тіж зреализувати ІІІ част фабулярного фільму «Акция Вісла. Поворот» в режысериі ведучого Стоваришыня Лемків Андрия Копчы. 75. річницю Акциі «Вісла» хотят упамятнити і Лемкы в Америці. Упамятніня орґанізуваны Lemko Hall пройдут 15. мая тр. в Йонкерсі в штаті Новый Йорк.

Змодернізувана желізниця на Паркову Гору в Креници

По тырваючій два рокы модернізациі, вчера, 1. мая, в Креници одкрыли шыново-теренову желізницю на Паркову Гору. Возит она туристів на верх Парковой Горы уж од 1937 рока і была першом того рода в цілій державі. Єй модернізация мала на ціли привернути стациям і ваґонам первістный дізайн, навязуючы до стилю арт деко з 30. років ХХ столітя. Завдякы схоснуваным мультімедиям і модерній технолоґіі одвиджаючы мают можливіст перенести ся в часі і познавати історию Крениці з 30. років минулого столітя. В часі подорожы ретро-ваґоном туристы можут примірно слухати радийовы авдициі основаны на новинах з ґазет з тамтых років. Додатково на верху Парковой Горы зрыхтувано выставу пн. «Машына часу», на якій мож обзерати експонаты звязаны з довоєнном Креницьом.

Дофінансуют будову солянковых інгаляторий в малопольскым воєвідстві

Радны Соймику Малопольского Воєвідства рішыли передати 3,5 млн злотых з буджету воєвідства на будову солянковых інгаляторий. Разом понад 900 тис. злотых отримат на тоту ціль 6 ґмін в новосандецкым повіті, в тым чыслі Мушына. За маршалком Лукашом Смулком, будова інгаляторий в Малопольщы то з єдной стороны інвестиция в здоровля жытелів, з другой додаткове зміцніня туристичной оферты найкрасшых закутин реґіону. В Мушыні інгалятория буде побудуваня в Загороді Здоровля і Рекреациі. На тоту ціль ґміна отримат 137 тис., значыт 37% вартости задачы. Як подал бургомайстер Мушыны Ян Ґольба, дополнюют і розбудовуют Тематичны Загороды на Запопрадю і тым самым підносят іх атракцийніст. Солянкова інгалятория акуратно вписує ся в іх оферту. Єст шанса, же атракция была бы готова уж під конец того рока.

Джерело фотоґрафіі: www.pkl.pl