Сумар дня на 1. червця/юнія 2026 р.

Приносиме вам сумар медияльной ґрупы ЛЕМ.фм+ на ден 1. червця/юнія 2026 р.

Проєкт упрощеных плянів уряджыня лісів в ґміні Устя Рускє

Війт ґміны Устя Рускє інформує, же в періоді од 1. червця/юнія до 30. липця/юлия тр. в Уряді Ґміны, в годинах працы уряду, буде публично вказаный проєкт упрощеных плянів уряджыня лісів находяхых ся на терені ґміны Устя Рускє, што не сут власністю Скарбу Державы і належат до фізичных осіб, на рокы 2027-2036. В періоді до 30 дни од даты публичного вказаня реченых документів, т.є до 30. червця/юнія тр., заінтересуваны властителі лісів можут складати евентуальны застережыня і внескы в справі упрощеного пляну уряджыня ліса. Документация тота єст тіж опубликувана на інтернетовым сайті ґміны, вєдно з інструкцийом єй чытаня. Там тіж находят ся дрібницьовы інформациі і формуляр до складаня уваг.

Ремонт ґмінной дорогы нр 271256К Залесє – На Вавку

В Ропі зачынат ся ремонт ґмінной дорогы нр 271256К Залесє – На Вавку. Інвестицию підпорило Надлісництво Лося, котре передало на тоту ціль 123 тис. злотых. Директор Реґіональной Дирекциі Лісів в Кракові запевнил тіж о одкрытости для реализациі будучых ініциятів того типу. Цілю єст зліпшыня комунікацийной доступности лісовых обшыри, як і безпекы руху і комфорту жытелів ґміны Ропа.

Комплекс Карпатскых Краєвидовых Парків в Коросні рыхтує мобільну аплікацию

Комплекс Карпатскых Краєвидовых Парків в Коросні рыхтує мобільну аплікацию для туристів і жытелів польско-словацкого погранича. Цифрове нарядя, котре має помочы одкрывати природничу і культурову дідовизну реґіону, буде удоступнене в серпни/авґусті. Проєкт єст реализуваный во спілпрацы зо словацкым партнером і фінансуваный з унійных середків в рамках проґраму Інтерреґ Польща-Словация. Аплікация буде доступна в трьох языках: польскым, словацкым і анґлицкым. Нарядя буде достосуване до потреб осіб з неполносправностями. Хоснувателі аплікациі отримают доступ до інтерактивных мап, навіґациі на туристичных трасах, календаря подій і модулу плянуваня прогульок. В аплікациі найдут ся тіж едукацийны материялы о еколоґіі і локальны цікавинкы. В рамках проєкту словацкій партнер купит ґеорадар, што служыл буде до баданя інфраструктуры і терену. Позысканы даны поможут в заряджаню публичным простором і охороні засобів, а част з них засилит інформацийну базу новой аплікациі.

Акция іманя медведів на Підкарпатю

На полудни Підкарпатя тырват акция іманя медведів. Покля што зіманых было 8. Звірятам наложено накарчникы GPS або мікрочіпы. Два драпіжникы, котры найчастійше підходили близко забудувань, были релокуваны в безпечне місце. Працы в терені ведены сут з ініциятивы Реґіональной Дирекциі Охороны Середовиска, во спілпрацы з дальшыма інституциями. Берут в них участ і працівникы Державных Лісів і експерты Татряньского Нацийонального Парку, котры од років радят си з проблемом зсинантропізуваных медведів, то значыт такых, што привыкли до близкости люди і гляданя ідла в іх сусідстві. В сумі зіманых має быти 18 медведів. Діяня сут частю проєкту о вартости понад 16 млн злотых, што має на ціли єдночасно хоронити брунатного медведя та зліпшыти безпеку жытелів. Проґрам єст фінансуваный головно з унійных сердків. В його рамках має тіж м.ін. фунґувати інтервенцийна ґрупа, котра буде реаґувала на зголошыня о звірятах підходячых під забудуваня. Проєкт потырват до кінця 2029 р. і має зменшыти чысло конфликтів медже людми і медведями, без забияня звірат.