Сумар дня на 1. серпня/авґуста 2023 р.

Приносиме вам сумар медияльной ґрупы ЛЕМ.фм+ на ден 1. серпня/авґуста 2023 р.

Проґрам XVII Світового Конґресу Русинів

Світова Рада Русинів схвалила проґрам XVII Світового Конґресу Русинів, якій буде проходил в днях од 17. до 19. серпня/авґуста в Новым Саді. Схваліня проґраму конґресу было єдным з пунктів 8. засіданя Рады 28. липця/юлия. Проґрам про делеґатів і гостів конґресу є поділеный на три дни. В першый ден, четвер, на участників жде культурный проґрам. Зрыхтувана буде выстава малярскых творів Влада Няраді і поетична стріча. На наступны дни є заплянуваный головный проґрам конґресу, в рамках котрого одбудут ся три пленарны засіданя. В пятницю пройде святочне одкрытя XVII Світового Конґресу Русинів, а тіж будут выголошены лавреаты Преміі Василя Турока-Гетеша i Нацийональной преміі за русиньскє уменя імени Івана Манайла Pro Arte Ruthenorum. В тот сам ден пройдут 1. пленарне засіданя і роботы в окремых комісиях Світового Конґресу Русинів, як і засіданя ХІ Світового Форуму Русиньской Молодежы. В пятницю одбуде ся і Медженародна науково-фахова конференция Світова русиністка днес і в будучности. Не забракне культурного проґраму, в виді театральной пєсы в русиньскым языку. В послідній ден конґресу пройдут два дальшы засіданя, перше підсумовуюче роботу комісий і ціли на будучы рокы. На остатнім засіданю буде голосуваня на председу конґресу і принятя резолюциі. Пак продолжал буде культурный проґрам в Рускым Керестурі.

Рушыла будова водного парку на Парковій Горі

В Креници рушыли працы при будові водного пляцу забав на Парковій Горі. Земны роботы зачали ся зараз по закінчыню Европейскых Ігр на початку липця/юлия, тепер будут завершены выляньом фундаментів під услуговый будинок, в котрым будут ся находити кавярня і тоалеты. В рамках інвестициі буде побудуваный водный пляц забав разом зо скеледромом, зовнішньом силовньом, лавками, алейками, мініамфітеатром, місцьом до рекреациі і кавярньом. Збогатит то оферту загорід сил натуры, де окрем тематичного ґратя до досвідчынь находят ся уж м.ін. і видокова плятформа, спацеровы алейкы, ци мініятуры характеристичных креницкых будинків. Для поправы комфорту, в рамках інвестициі буде перебудувана і дорога до загорід. Ціла задача має быти завершена в ІІІ кварталі будучого рока.

Презентация обновленого журналу «Отцюзнина».

В суботу 29. липця/юлия в ужгородскым Центрі Культур Нацийональных Меншын Закарпатя прошла презентация першочо чысла обновленого русиньского культурно-белетристичного журналу «Отцюзнина». В минулым журнал выходил од 2016 до 2018 р., тепер подарило ся обновити роботу редакциі завдякы проф. Павлови Робертови Маґочійови, котрый фінансово забезпечыт посередництвом фінансів од меценатів друкуваня публикациі на два рокы, в чыслі осмох выдань. Головным редактором Отцюзнины єст Юрий Шыпович, голова Русиньского Культуролоґічного Клюбу. Клюб вєдно з Закарпатскым Областным Науково-Культуролоґічным Обществом ім. Александра Духновича, котрого головом єст Юрий Продан, сут выдавателями журналу. Квартальник чыслит 40 сторін і містит так актуальны темы, бесіды, як і русиньску історию, краєзнавство, етноґрафію і звыкы. Більше на тему обновліня журналу «Отцюзнина» чытайте в дописі на нашым портали.

50. уродины БНП

Бєщадскій Нацийональный Парк просит на подіі в рамках своіх 50. уродин. Святочны акциі пройдут в вікенд 5.-6. серпня/авґуста в Волосатым і Устриках Нижніх. В проґрамі музичны выступы, прогулькы шляками, конкурсы і атракциі для діти. Полный проґрам найдете на сайті Бєщадского Нацийонального Парку.