Голосник

Сумар дня на 10. квітня/апріля 2020 р.

Приносиме вам сумар медияльной ґрупы ЛЕМ.фм+ на ден 10. квітня/апріля
2020 р.


Ситуация Русинів в Сербіі в час пандеміі

Кризис звязаный з пандемійом коронавіруса досяг і Сербію, а тым самым і села, де жыют Русины. Олена Папуґа, русиньска депутатка сербского парляменту і членкыня Нацийонального Совіту Русинів в Сербіі, оповіла про ситуацию на місци. Од 5-ой годины пополудни до 5-ой рано обовязує в Сербіі поліцийна година, особы выже 65-ох років можут выходити з хыжы лем раз на тыжден в вызначеных годинах. Папуґа зазначыла, што люде гын сут здисциплінуваны і в Войводині, де жыют Русины, неє так вельо зараженых, як в інчых реґіонах Сербіі. Депутатка подала, што закрыты сут вшыткы фірмы і фабрикы, люде не достают выплат, барз тяжко є і ґаздам, якы не мают де продавати свіжых ярин, неє ани кым робити при роботах в поли. Подля слів Олены Папуґы – сербска влада обіцяла помочы, лем не знатя коли і як, дотепер примірово фірмы не были звільнены з плачыня місячных социяльных і здравотных складок за працівників, хоц заклады не роблят. Позитивом є, што Сербія забезпечыла онлянове вчыня і в языках меншын. Штоденно ведены сут занятя і з русиньского языка.

Поміч Ґорлицкого Повіту для шпиталя

Заряд Ґорлицкого Повіту вышол з ініциятивом до ґмін ґорлицкого повіту, жебы разом фінансово підтримати Специялистичный Шпыталь в Ґорлицях і купити 15 апаратів штучного дыханя, што были замовлены скорше. Ініциятива стрітила ся зо вступном апорбатом війтів, треба іщы, жебы волю потвердили Рады Ґмін. Окрем того Заряд Повіту рішыл сфінансувати шпытальови додатковы джерела медичного оксиґену для потенцияльных хворых на COVID-19. Замовлено тіж додатковы середкы особистой охороны, в тым 1000 штук єдноразовых комбінезонів. На тепер 100 передано до шпыталя, 120 передано до пунктів кварантанны в Шальовій і в Бічы та 60 передано до Домів Социяльной Опікы. Посліднім інституциям передано іщы 30 літрів дезинфекуючой течыны і парудесят масочок.

Омудсман скритикувал заказ входу до лісів і парків

Польскій Омбудсман Адам Боднар реаґує на рішыня уряду влады заказуюче входити до лісів і нацийональных парків. Заказы выдано на основі скоро схваленых недавно документів: спецзакону про борбу з коронавірусом та розпоряджыня премєра Моравєцкого, котре тыкат ограничынь в переміщаню ся по Польщы в часі тырваня епідеміі. Заказ не обнимат полювачів. Тисячы осіб зачали підписувати ся під петициями о одкликаня заказу. В віторок до справы однюс ся і омбдсман Боднар. Скєрувал писмо до Міхала Вося, міністра середовиска, в котрым вказує, што введіня заказу входити до лісів не мало правной основы. Уважат тіж, што «беручы до увагу інчы приняты розвязаня звязаны з протидіяньом пошрюваня ся епідеміі, заказ входити до лісів є непотрібный і за далеко ідучый». На конец апелює до міністра Вося о одкликаня заказів входити до лісів і нацийональных парків.

Віртуальні о Варголи

Лондоньска ґалерия Tate Modern орґанізує дармову віртуальну прогульку по выставі присвяченій творчости Енді Варголя. Експозиция вернісаж мала 12. марця при чым з огляду на пандемію неодолга інституцию закрыто, не даючы можливости тым самым обзерати выставы. На каналі ґалериі на плятформі youtube мож пообзерати фільм, завдякы котрому запознаме ся з експозицийом і послухаме про Варголя. На выставі мож видіти більше як 100 робіт представляючых полну ретроспективу творчости колоря поп-арту, м.ін. менше знаны портреты трансджендеровых жен і дреґ-квін ци рисункы представляючы молодых мужчын в приватных, інтимных моментах, якы походят з 50. років минулого стотітя. Скорше не было можливе іх вказати, зато што тема, котром занимал ся Варголь, выкликувала контроверсиі аж і в ліберальній Америці. Коли автор хотіл іх вказувати, стрічал ся з одмовом. Выстава потырват до 9. вересня/септембра.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі