Сумар дня на 11. липця/юлия 2024 р.

Приносиме вам сумар медияльной ґрупы ЛЕМ.фм+ на ден 11. липця/юлия 2024 р.

Минул ся заменицкій Кєрмеш

В суботу 6. липця/юлия в Заменицях на Нижнім Шлеску одбыл ся ХХ Лемківскій Кєрмеш, якій традицийно проходит при місцевій грекокатолицкій парохіі св. Йоана Крестителя. Заменицкій Кєрмеш од років звязаный є тіж з Медженародным Фолкльористичным Фестівальом «Світ під Кычером». Стріча зачала ся Молебном до Пресвятой Богородиці. Пак чысленны делеґациі склали квітя під пропамятном таблицьом, жебы оддати чест выселеным в рамках акциі «Вісла» і іх близкым. Серед присутных были представникы самоурядовых власти з заступцьом війта ґміны Хойнів Радославом Ліпом. Квітя зложыла тіж делеґация першой в Польщы повыселенчой соспільной орґанізациі – Стоваришыня Лемків, в особах: Андрий Копча, ведучый Головного Заряду СЛ та Євген Габура – заступця ведучoгo. Промамятна таблиця уфундувана была перед двома роками. По реліґійній і пропамятній части одбыли ся концерты – выступили так реґіональны, місцевы колекитвы, як і запрошены гості з заграниці, якы брали участ в Фестівали «Світ під Кычером».

ҐОК Устя Рускє орґанізує варштаты для діти

Як інформує Ґмінный Осередок Культуры в Устю Рускым, од 15. липця/юлия стартуют літні театральны варштаты для діти. В тых занятях участ возмут діти з Малой ґрупы «Племя – меджепоколіньова театральна ґрупа», яка діє при місцевым ҐОК-у. З Ґміны Устя Рускє ґрупа може приняти на варштаты іщы пятеро діти. В часі двотыжньовых занять, участникы будут ся бавити, імпровізувати, співати. Діти наново зрыхтуют представліня «Бескід без кіту» на основі книжкы Мариі Стшелецкой. Заграют дві пєсы на подіі UjŚCIE KULTURY – teatr i góry, якій одбуде ся в днях 26.-29. липця/юлия.

Грошы до словацко-польского пригранича

Майже 1 милийон евро піде до словацко-польского пригранича на проєкты в обшыри туристикы. Кінцьом червця/юнія тото в Ряшові схвалил Комітет про малы проєкты в рамках Фонду малых проєктів Проґраму Interreg Польща – Словация 2021-2027, котрого справцьом є Здружыня Еврореґіон Карпаты. Дотля было схваленых 15 малых проєктів. Єдным з них є замір Крайского Музею в Пряшові з польскыма партнерами – Округовым Музейом в Новым Санчы і Округовым Музейом в Ряшові, котры хотят вєдно ожывити королівску обходну пут Via regalis. Грошы підут і до русиньскых реґіонів – м.ін. до Нацийонального Парку Полонины, міста Меджелабірці ци Бардийова. Кінцьом того місяця будут свалюваны дальшы малы проєкты – так само жадателями будут єдиниці з русиньской обшыри на Пряшівщыні.

Уж заран Русиньска Ватра в Малым Липнику

І на конец іщы раз припоминаме, што уж заран зачынат ся ХІІІ Русиньска Ватра в Малым Липнику на Пряшівскій Руси, яка потрыват через полны три дни. Проґрам зачне ся по 18.00 год. Буде перегляд дітячых фольклорных колективів і лавреатів послідніх річників фестівалю «Співы мого роду». Звіздом того вечера буде русиньскій солиста Штефан Штець, якій выступит зо свойом ґрупом Файта. Суботній проґрам на головній сцені зачне ся о год. 16.30. В тот ден выступлят колективы з реґіону і близкой околиці, як і тоты з кус дальшой, м.ін. Черговчан з Бардийова, Маковиця зо Свидника, ци Борєвка з Кошыц. Кульмінацийным пунктом суботнього проґраму буде великє паліня ватры. Пак буде забава з народном музиком і фольклорныма колективами. Не бракне і додатковых атракций, такых як выстава фороґрафій Міляна Маласта «Молитва дерева», дротарскы творчы варштаты ци школа танця. Окрем того буде мож послухати про язык як част достоменности народу ци переміны русиньского облечыня в просторі і часі. В ґастрозоні буде мож скоштувати реґіональне ідло. Буде і специяльна зона для діти, де активности для наймолодшых будут вести акторы з Театру Александра Духновича. В послідній ден ватры, в грекокатолицкым храмі святых Космы і Даміяна одслужена буде Літургія, а пак духовны пісні заспіват Івана Бріллова.