Сумар дня на 11. мая 2023 р.

Приносиме вам сумар медияльной ґрупы ЛЕМ.фм+ на ден 11. мая 2023 р.

Модернізация команецкой стациі

Як інформує ґміна Команча, была підписана умова на будовляны роботы тыкаючы перебудовы будинку желізницьовой стациі в Команчы. Ремонт дворця буде тыкал так само зміны способу його хоснуваня – в середині буде находила ся і част пристосувана до услуговой функциі. Змодернізуваный будинок буде заадаптуваный на потребы Центра Інтеґрациі і Активізациі на пограничы Східніх і Західніх Карпат. В обєкті буде Публична Бібліотека ім. Єжы Гарасимовича в Команчы, Ізба Артефактів з І світовой войны та Пункт Туристичной Інформациі. Окрем того в будинку в пляні сут комунальны помешканя. Конец адаптацийных прац вызначыли на 2025 р.

Вмер заслуженый русиньскій майор

Як подала Чехословацка громада леґіонарска, 9. мая в віку 98 років вмер воєнный ветеран, Русин – майор Михал Гечка. Был участником ІІ світовой войны як член 1. Чехословацкого Армадного Корпусу ґенерала Людвіка Свободы. Михал Гечка вродил ся 24. листопада/новембра 1924 р. в Синевирі на Підкарпатскій Руси. До протифашыстичного одбоя придал ся коло Хусту як 18-річный, было то на яр 1942 р. Далшый рік приступил до партизантів. Пак в листопаді/новембрі 1944 р. вступил до Корпусу ґен. Свободы. Робил як інтендент, пак быl приділеный до піхоты і ішол на фронтову ленію. Брал участ в освободжыню Словациі, был участником Карпато-Дукляньской Операциі. Конец войны застал го на Мораві. В 2008 р. вылша книжка пн. «Сын Карпат», в якій сут описаны його воєнны пригоды. Покійный жыл в Кунштаті на Мораві. Вічна Йому Памят!

Упамятніня кінця ІІ світовой войны

З нагоды Дня перемогы над фашызмом і 78. річниці закінчіня ІІ світовой войны трaдицийно проходили в Свиднику і Дукли упамятняючы подіі. В Свиднику подія проходила при памятнику армадного ґенерала Людвіка Свободы. В упамятнінях брали участ представникы міста і окресу, медже інчыма пріматорка Марцела Іванчова і предноста Окресного уряду Михал Ільканин. Як інформувало місто Свидник, з нагоды річниці завершыня войны 12. мая буде проходил в Свіднику квіз школярів свидницкых основных шкіл, котрый рыхуют робітникы Воєнного Історичного Інституту – музейного одділіня во Свиднику. Припоминаме, што ІІ світова война была початком кінця давной Лемковины, в єй наслідстві Лемкы были розсіяны од Одры по Донбас. Тогорічна річниця завершыня ІІ світовой войны (подібні як попередня) єст і нагодом до закликуваня о мир на Украіні і завершыня тырваючой аґресиі Росийской Федерациі.

Чырч розбудовує школу

В селі Чырч, што на Пряшівщыні, хотят на звекшыня розмірів місцевой школы здобыти середкы з тзв. пляну обновы. Самосправны власти недавно підписали контракт в тій справі. Подля старосты села Михала Дідика, кєд вшытко піде добрі, розбудова могла бы зачати ся в слідуючым році. На надбудуваня і добудуваня новых просторів має подля публикуваного контракту іти веце як 920 тис. евро. Школярі другой ступени в селі Чырч мусят в тым часі ходити до околичных сел, кажде рано ходит автобус полный діти, прим. до 10 км оддаленого Орлова. Вдяка розбудуваню школы выникне вісем кляс, і дальшы специяльны клясы, а школа мала бы ся звекшыти о 100%. Чырч бы так мал тзв. полно орґанізувану школу, значыт мал бы першу і другу ступін основной школы.