Сумар дня на 12. серпня/авґуста 2026 р.

Приносиме вам сумар медияльной ґрупы ЛЕМ.фм+ на ден 12. серпня/авґуста 2026 р.

Третій того рока набір оферт в конкурсі МВСіА

Додатковы грошы на проєкты нацийональных і етнічных меншын. Міністерство Внутрішніх Справ і Адміністрациі оголосило додатковый набір офер на реализацию публичных задач, котры підперают охорону, захованя і розвиток культурной достоменности нацийональных і етнічных меншын та реґіонального языка. Внескы можут складати орґанізациі і підметы, котры реализуют ініциятивы звязаны з культуром, едукацийом, выдавничом діяльністю, медиями, охороном спадковины ци документуваньом меншыновых спільнот. Ресорт підкрислят, же особливо прихильні будут смотріти на проєкты, котры будут хоснувати модерны формы переказу, в тым материялы авдийо публикуваны в інтернеті і социяльных медиях. Дотациі буде мож перезначыти тіж на орґанізуваня артистичных подій, ведіня бібліотек, діяня світлиці ци едукацию діти і молодежы. Проґрам має підперати захованя культурной ріжнорідности в Польщы та розвиток языків, котры хоснуют меншыновы спільноты. Дрібницьовы вымогы набору і условія дофінансуваня доступны сут на інтернетовым сайті міністерства.

Хто бы хотіл студиювати вынятковый напрям студий?

Тырват друга тура рекрутациі на унікатовый напрям студий, котрый посвяченый є Карпатам. Ягайлоньскій Університет заохочат кандидатів, жебы аплікувати на ліценцияцкы студиі Карпатскій Реґіон: ентолінґвістика і культуровы студиі. То інтердисциплінарный напрям для осіб, котры сут заінтересуваны языками, історийом і культуром держав карпатского реґіону. Студенты будут мочы познати м.ін. традициі Польщы, Украіны, Словациі, Румуниі, Чех, Словациі і Мадяр, а тіж навчыти ся словацкого, украіньского, румуньского і – што єст выняткове для того напряму – лемківского. Важным елементом проґраму сут тереновы баданя ведены в карпатскых реґіонах в Польщы і за границьом. Напрям реализуваный єст спільні через пару інститутів Ягайлоньского Університету, што надає му інтердисциплінарный характер. Што вартат підкрислити, занятя з лемківского языка одкрыты сут не лем для студентів учельні, але тіж для осіб споза Університету. Абсольвенты можут найти роботу медже інчыма в інституциях культуры, медиях, выдавництвах ци в туристці. Друга тура потырват до 13. вересня/септембра тр.

В Креници одбудут ся світовы змаганя в слекляйн

Крениця рыхтує ся на історичну спортову подію. Од 3. до 6. вересня/септембра в Солотвинах Арені одбуде ся в Польщы Погар Світа в слекляйн [slackline], значыт ходжыню по тасьмі, котра єст завішена над земльом. Найвекшом атракцийом змагань буде веце як пілторакілометрова тасьма розпята медже видоковом вежом Солотвины Арена а Креницком Яворином. В найвысшым пункті буде ся находила веце як 200 метрів над земльом. До Крениці приде коло 30 передовых спортовців з цілого світа, м.ін. зо ЗША, Японіі ци Кытаю. Орґанізаторы заповідают не лем ривализацию о пункты Погару Світа, але тіж пробу, жебы установити рекорд світа в переході на час і побитя рекорду Польщы в долгости тасьмы. Теперішній рекорд державы выносит 1500 м. Тогорічна конструкция має быти іщы долша. В проґрамі нашли ся тіж видовисковы конкуренциі з ефектовныма скоками і акробациями. Подія має промувати Креницю як місце орґанізуваня спортовых змагань о світовій позициі.

Kapela ze Wsi Warszawa заграт в Ґорлицях

Музика інспірувана традицийом Карпат зас зазвучыт в Ґорлицях. В днях 22. і 23. серпня/авґуста на Рынку одбуде ся Фестіваль 4 Страны Карпат. На сцені выступлят аристы з Польщы, Сербіі, Мадяр ци Грециі. Найвекшом звіздом подіі буде концерт ансамблю Kapela ze Wsi Warszawa в проєткі з тріо Bassałyki. В проґрамі заплянували тіж туристичны торгы, плястичны варштаты і анімациі для діти. Вшыткы концерты дармо.