Сумар дня на 13. грудня/децембра 2021 р.

Приносиме вам сумар медияльной ґрупы ЛЕМ.фм+ на ден 13. грудня/децембра 2021 р.

Радийова стріча в Рускій Бурсі

В суботу, 4. грудня/децембра, ден перед Дньом Русинів Польщы, в просторах ґорлицкой Руской Бурсы засідала редакция медияльной ґрупы ЛЕМ.фм+. На стрічы были участны редакторы з Лемковины, Пряшівщыны, Підкарпатской Руси, з чужыны – західніх земель Польщы, Варшавы та Кракова. Присутны рішыли головны проблемы, якы явили ся вчас тырваючого рока. Єдным з важнійшых пунктів засіданя было рішыти проґрам высыланя в будучым році. Дакотры з проґрамів веденых нажыво будут мати выдолженый час штоденного высыланя, явила ся і думка пошырити новины о вісти з цілого світа. Бесіда односила ся і до фінансуваня діяльности лемківскых медий в будучым році. Як все, редакторы мали і школіня з технікы і обслугы нарядя потрібного до штоденной роботы.

Завершеный проєкт «Одроджены разом з Республиком»

Завершеный черговый проєкт Клюбу Любителів Лемковины пн. «Одроджены разом з Республиком», реализуваный при спертю Осередка Православной Культуры Елпіс в Ґорлицях. Проєкт был дофінансуваный з середків Музею Істориі Польщы в Варшаві. Головном цілю задачы было глядати архівальны фотоґрафіі і документы, вказуючы процес одроджыня социяльно-реліґійного жытя Лемків на полудни Польщы по 1918 р. Проєкт мал не лем приближыти шыршій публиці мало знану історию одроджыня православных парохіяльных структур на Лемковині, але і вказати влияня Лемків на будуваня незалежной і демократичной державы, а єдночасно і влияня Польской Державы на плеканя православныма громадянами своіх реліґійно-культуровых традиций. Зобраны в рамках проєкту фотоґрафіі і документы были здіґітализуваны, а знищены знимкы были цифрово оброблены. Зорґанізуваны были і меджепоколіньовы варштаты, што пошырили історичне знаня участників та дозволили на селекцию і упорядкуваня зобраного фотоґрафічного материялу. Наконец зорґанізувана была выстава і печатаный каталоґ зобраных знимок.

Новый розклад ізды PKP

Од вчера, 12. грудня/децембра, обовязує новый розклад ізды Польской Державной Желізниці PKP. Буде він обовязувал наступных 12 місяців. Окрем інчого введене было получыня медже Бєщадами і Нижнім Шлеском. Одтепер в вікенды потягом «Ветліна» буде ся мож достати з Загіря аж до Клодзка через Тарнів, Краків, Катовиці, Ґливиці і Ополя. Потяг буде ся тіж затримувал на стациях Біч і Ґорлиці-Загіряны. З пресідком в Кракові буде мож ся легко достати і до Вроцлавя. Змінены сут і годины одіздів штоденных потягів PKP Intercity. Скорше зо стациі Ґорлиці-Загіряны будут одходити м.ін. потягы до Кракова і в Бєщады через Ясло, Коросно і Санок.

Тяжкы условія для гірской туристикы

На інтернетовым сайті Бєщадского Нацийонального Парку явил ся туристичный комунікат, припоминаючый о тяжкых условіях для гірской туристикы. Сут они спричынены грубом верством снігу, што находит ся на шляках. В высшых партиях гір ограничена єст і видочніст. В вельох місцях стежкы сут невыдоптаны, а груба верства тяжкого снігу на голузях дерев горозит іх зваліньом. Условія в тій хвили вымагают специялистичного приготовліня, одповіднього облечыня, раків і дрібницьового пляну прогулькы. Для безпекы мож додатково зголосити свій выхід на шляк ґрупі GOPR та заінсталювати на телефоні аплікацию Ratunek. Перед самым выходом треба провірити погодовы проґнозы. Актуальну хвилю мож провірити м.ін. на вебсайті GOPR або через інтернетовы камеркы на вебсайті Бєщадского Нацийонального Парку.