Сумар дня на 14. листопада/новембра 2024 р.

Приносиме вам сумар медияльной ґрупы ЛЕМ.фм+ на ден 14. листопада/новембра 2024 р.

Ювілей парохіі в Самбожу

Єдна з лемківскых парохій на західніх землях святкувала своє 70-літя. В неділю, 10. листопада/новембра торжественном Божеском Літургійом упамятнено річницю возникніня православной парохіі св. Параскєвы в Самбожу на Нижнім Шлеску. Істория самборской парохіі є стисло повязана з дольом лемківского народу – выселеныма в рамках Акциі «Вісла» перед 77 роками. Святочну літургію одслужыли парох о. Ігор Габура, о. Артен Лобода і діакон Даміян Лучковец. Церков в тот ден была выполнена. Початкы самборской парохіі то 1952 р., коли парох в Єленій Горі і адміністратор парохіі в Мальчыцях, о. Штефан Бігун, поінформувал митрополиту Макария, што в Самбожу і сусідніх селах є вельо Лемків без церковной опікы. 15. січня/януара 1954 р. Уряд до Справ Віроісповідань передал православным євангелицку каплицю, находячу ся в забудові палацику в Самбожу. Перша Божеска Літургія была одправлена 7. квітня/апріля 1954 р. Служыл єй о. Штефан Бігун, котрый перше нюс душпастырску опіку на Лемковині во Фльоринці.

Смутна річниця села Токаік

19. листопада/новембра 1944 скоро рано німецкы нацисты спалили русиньскє село Токаік в окресі Стропків і застрілили 32 невинных молодых хлопів. Жены і діти выгнали з рідного села і тоты через два тыжні не знали, што ся стало з іх близкыма – мужчынами. Як раз того рока минят 80 років од тых траґічных подій. В звязку з тым в Словацкым Нацийональным Музею – Музею Русиньской Культуры в Пряшові будут припомнены тоты траґічны подіі ІІ світовой войны на русиньскій териториі. Вечер споминів одбуде ся 28. листопада/новембра о 16.00 год. в музейных просторах.

Спілпраця Малопольщы і Пряшівщыны

Малопольскє Воєвідство і Пряшівскій Самосправный Край вяже долгорічна спілпраца в ріжных обшырях. Дальше прямованя той спілпрацы приближыла недавна стріча партнерскых реґіонів в Кракові. Обидві стороны єй видят головно у сфері транспорту, туризму і в біциґльовым транспорті. В рамках продолжаня спілпрацы в плянах сут выстава творів Енді Варгола в Кракові і реализация спільных творчых пленерів, але тіж темы одновы Украіны. В рамках пріоритетів буде тіж наприклад дальша будова і розвиток біциґльовой стежкы Eurovelo 11. Спільный цілів є очывидно більше. Спілпраца медже ПСК і Малопольскым Воєвідством зачала ся 14. жолтня/ октобра 2003 р. договором на Любовняньскым Граді.

Ювілей церкви в Рускій Кайні

В неділю 10. листопада/новембра ювілей свойой церкви святкували тіж грекокатолицкы вірны в Рускій Кайні. При торжественній літургіі дякували Богу за 200. річницю збудуваня Храму святого Архістратига Михаіла. В торжестві брал участ Высокопреосвященный Йона, пряшівскій архієпископ і митрополита, котрый підкрислил ревніст і віру предків, якы перед 200 роками вырішыли побудувати божый храм. В рамках річниці одбыло ся і посвячыня одновленого екстерєру і інтерєру храму, котрый был по землетрясіню з минулого рока пошкодженый.