Сумар дня на 14. мая 2026 р.

Приносиме вам сумар медияльной ґрупы ЛЕМ.фм+ на ден 14. мая 2026 р.

Почестным Громадянином Калушской Громады стал Федір Лабик

Федір Лабик отримал званя Почестного Громадянина Калушской Громады, згідно з рішыньом Калушской Містецкой Рады. Федір Лабик был одзначеный за долголітню працу і вызначны досягніня, в тым на ниві лемківской культуры. Лавреат вродил ся 20. марця 1937 р. в Святковій Великій, ясельского повіту. В 1945 р. родина Лабиків была выселена на радяньску Украіну – до сталіньской области (днес донецка). Од 1946 р. прожыват в Калушы, де остаточно оселяли ся Лемкы, якы втікали з далекого сходу. Был депутатом Калушской Містецкой Рады другого демократичного скликаня. В 1955 р. был чемпіоном Калуша зо спортовой ґімнастикы. В 1992 р. обрали го ведучым Калушской Містецкой Громадской Орґанізациі Всеукраінського Товариства «Лемківщына». Неодолга был за справом діяльности Лабика основаный хор «Студенка». Лабик є доднес активным учасником колективу «Студенка», де співат, танцює, выконує вершы та гуморескы по лемківскы. Был ініциятором і орґанізатором одкрытя в Калушы скульптурной композициі в памят переселенців з Польщы – в тым чыслі з Лемковины. В 2025 р. Капітула Стоваришыня Лемків признала му Нагороду ім. Епіфана Дровняка – Никыфора. Одобрал єй особисто вчас Лемківской Ватры на Чужыні в Михалові.

Рыхтуваня до РутенАле

На Лемковині одбуде ся неодолга РутенАле – 13. Медженародне Бієнале Лемківской / Русиньской Культуры, котрого першый ден буде в суботу, 23. мая в Креници, а другій неділю 24. мая в Высовій. На Бієнале все презентуют ся лемкіскы/русиньскы творці з Польшы і заграниці. До днес Бієнале гостило творців з 11 держав. Того рока выступят русиньскы артисты з: Польщы, Словациі, Украіны, Румуніі, Мадяр, Хорвациі і Сербіі. На початку, в суботу рано, пройде засіданя Світовой Рады Русинів. Пак в само полудне на старым креницкым цмонтери одправлена буде панахіда на гробі Епіфана Дровняка – Никыфоря. Дальше зложене буде квітя під памятником артисты на Бульварах Дітля. Одтамале перейде хоровід до Старого Здравичного Дому на Креницкым Дептаку, де о 15:00 год. в бальовій сали одкрыты будут выставы малюнку, ікон і фотоґрафій. В бальовій сали пройдут і два концерты – о 15:30 і 19.00. Другій ден Бієнале зачне ся в неділю о год. 13:30 зложыньом квітя при памятнику в Устю Рускым. Пак подія перенесе ся до амфітеатру в Высовій, де о год. 14:30 буде мож выслухати прелекцию о русиньскій культурі. О 15:00 год. одбуде ся там фіналовый концерт. Вступне на вшыткы подіі дармо.

Europe Direct во Свиднику

В віторок 12. мая одкрыли в Свиднику новый інформацийный центр Europe Direct, котрый має служыти як пункт контакту медже жытелями піддукляньского реґіону і інституциями Европской Уніі. Центр выникнул під покровительством Конфедерациі профсоюзів Словацкой Республикы, і належыт до сіти десятьох новых центрів Europe Direct на Словациі. Выбір Свидника є повязаный з тым , же реґіон має долготырвалы социяльны і економічны проблемы. Задачом центра є давати інформациі о Европскій Уніі, творити простір на дискусию о европскых темах і орґанізувати освітні активности для шкіл і жытелів. Медже головны пріоритеты належыт підпора діалоґу з громадянами, підниманя свідомости о правах громадян, безпеці, охороні жывотного оточыня ци діґітальній трансформациі. Europe Direct то містны контактны центры, котры подают інформациі і одповідают на вшыткы вопросы о европскых ділах.