Голосник

Сумар дня на 14. вересня/септембра 2020 р.

Приносиме вам сумар медияльной ґрупы ЛЕМ.фм+ на ден 14. вересня/септембра 2020 р.


“Порожній Ліс” номінуваный до Ніке
3. жолтня/октобра тр. буде передана єдна з найбарже престіжных польскых літературных нагорід – Ніке. Выріжніня єст признаване од 1997 р. В минулых роках премію отримали м.ін. Ольга Токарчук, Вєслав Мыслівскій, Єжы Пільх, Тадеуш Ружевич ци Мариюш Щыґєл. Фондаторами Літературной Нагороды Ніке є «Ґазета Выборча» та Фонд Аґоры. Літературну Нагороду Ніке признає жырі, єднак свій голос мают і чытачы – серед семох номінуваных фіналистів выберают свойого фаворита. Охочы можут написати о выбраній книжці рецензию. Того рока єдным з семох фіналистів Ніке являт ся «Порожній Ліс» Монікы Шнайдерман, печатаный выдавництвом Чарне. Є то есей про довоєнный Воловец, котрый был селом, де жыли Лемкы, Жыды, Полякы і Циґане. Авторка описує епідеміі, якы мучыли цілый реґіон, антисемітскы погромы, І і ІІ світовы войны. Кінчыт на акциі «Вісла», котра спричынила, што тепер є гын порожньо. Голосуваня на найліпшу книжку потырват до 27. вересня/септембра тр. до 15.00 год. 3. жолтня/октобра поданы будут результаты голосуваня.
Театральны варштаты в Саноку
Саноцкій Дім Культуры просит жытелів саноцкого повіту в віку 30-65 років до участи в дармовых театральных варштатах, якы пройдут в днях 19.-24. жолтня/октобра тр. Варштаты завершыт показ на сцені Саноцкого Дому Культуры. В часі варштатів выріжнена буде ґрупа осіб, якы возмут участ в театральній пєсі пн. «Лемківска Одисея» в режысериі Войцєха Фаруґы, реалізуваній на сцені Ґорлицкого Центру Культуры в липци/юлию і серпни/авґусті 2019 рока. Варштаты і пєса будут присвячены темам культуры і істориі Лемків, зато специяльно глядают осіб репрезентуючых лемківску меншыну, або заінтересуваных тыма темами. Театральны варштаты будут ведены згідно з ідейом community theatre, тє. іх основом буде істория членів соспільности, жытелів. Проєкт «Лемківска Одисея Объізд» єст реалізуваный в рамках проґраму Театр і Танец 2020 Міністерства Культуры і Нацийональной Спадковины.
Новый вид Климківкы
Тырвают роботы при заґаздуваню берегів Климківкы. Під конец серпня/авґуста в вельох місцях находили ся іщы земля і пісок. Днес більшіст терену єст выплянтувана. Там, де іщы недавно было болото, тепер єст рівна і суха земля. Помалы зачынают ся тіж вказувати заповіджены в ґмінных плянах компактовы пляжы. Штораз більше одтинків пути, з якых мож захоплювати ся Низкым Бескідом і короном запоры, єст уж выложена бруком або асфальтом. Кінчат ся і роботы при будові ґрільового задашыня.
Порожніют пути в Низкым Бескіді
Помалы кінчыт ся уж літній період, а разом з ним порожніют туристичны пути в Низкым Бескіді. По барз великым руху на верху Лацковой і в околицях, туристів єст тепер о вельо менше. Причыном великого заінтересуваня туристів тым реґіоном в вакациі могла быти пандемія коронавіруса. В першій декаді вересня/септембра рух был уж меншый, тіж зо взгляду на гіршу хвилю і дощ. Конец літа і початок осени то можливіст прогульок для конесерів той части Бескідів, якы глядают гев тишы і контакту з природом. Подля синоптиків, путуючым в Бескіды буде іщы в тым тыжни товаришыла добра хвиля.
Шеруй.

О авторі

Ленка Стефановска

Коментарі