Сумар дня на 16. червця/юнія 2021 р.

Приносиме вам сумар медияльной ґрупы ЛЕМ.фм+ на ден 16. червця/юнія 2021 р.

Стріча для діти в Рускій Бурсі

В минулу суботу, 12. червця/юнія, в Рускій Бурсі в Ґорлицях прошол Інтеґрацийный Пікнік з нагоды Дня Дітины. Стріча зачала ся од показовой пробы молодошй ґрупы ансамблю Терочка, пак были спільны забавы, предовшыткым руховы, цілю інтеґрациі діти, особливі новых членів Терочкы, котры были взяты до ансамблю. Додатковом атракцийом было огниско з печыньом кобаскы. Пікнік зорґанізувано завдякы дотациі Міністра Внутрішніх Справ і Адміністрациі.

Русины на Словациі святкували

Минула субота была важным дньом для Русинів жыючых на Словациі. Як раз празднували своє свято – Ден Русинів Словациі. Торжества проходили в парох місцях: в селі Збой, в Меджелабірцях, во Свиднику, в Спишскій Новій Веси і в Чертіжным. Ден Русинів Словациі нашол своє місце і в медияльным просторі. Центральны празднуваня в Меджелабірцях реляцийонуваны были в Радийо Патрия та в головных новинах словацкой публичной телевізиі, радийо Реґіна цілый ден надавало проґрам про Русинів, а вечером выемітували премєрову радийопєсу зрыхтувану Театром А. Духновича. Про Русинів памятали тіж політикы. Президентка Словациі Зузанна Чапутова поздоровила Русинів з іх святом в специяльні зрыхтуваным відео, желаня загнал тіж премєр Словацкой Республикы Едуард Геґер та полномічный влады про нацийональны меншыны і етнічны ґрупы Ласло Буковскій. Полный допис з той подіі найдете на нашым портали.

Вілямівскій язык дале не буде узнаный за реґіональный

Вчера в польскым соймі проходило засіданя соймовой страны Комісиі Нацийональных і Етнічных Меншын. Цілю засіданя было розсмотріти внесок Ведучой Комісиі посланкыні Ванды Новіцкой підняти законодавчу ініциятиву в справі новелизациі Уставы з дня 6. січня/януара 2005 р. о нацийональных і етнічных меншынах та о реґіональным языку. Новелизация уставы мала бы тыкати узнаня вілямівского языка за реґіональный. В голосуваню взяло участ шістнадцетеро послів. Осмеро голосувало за новелизацийом, осмеро было проти (вшыткы послы з партиі Право і Справедливіст, м.ін. Барбара Бартусь). В результаті голосуваня внесок был одшмареный. На днес статус реґіонального языка має в Польщы лем кашебскій, дозвалят то м.ін. монтувати двоязычны таблиці ци здавати матуру з того языка. Пробы узнаня вілямівского за реґіональный, подібні як шлезского, тырвают уж пару, парунадцет років. Фурт неуспішні.

Деревяны бункры на пути в Низкым Бескіді

Розбудова інфраструктуры на гірскых путях то єден з пріоритетів самоуряду Малопольского Воєвідства. Інтенцийный лист в тій справі підписали в понедільок, 14. червця/юнія, представникы власти реченого воєвідства, Міністерства Розвитку, Працы і Технолоґіі, Реґіональой Дирекциі Державных Лісів в Кракові, Малопольской Туристичной Орґанізациі та Польского Туристично-Краєзнавчого Товариства. Самоуряд хоче побудувати колибу на Любаню в Ґорцах та туристичны деревяны бункры на путях ріжных гірскых пасм в реґіоні. Бункры будут мати просту форму з єдноспадистым дахом, подібну до шатра. Першы обєкты найпевнійше вознесут на путях в Низкым і Высповым Бескідах.