Сумар дня на 16. грудня/децембра 2020 р.

Приносиме вам сумар медияльной ґрупы ЛЕМ.фм+ на ден 16. грудня/децембра 2020 р.

Церков в Зимній Воді по дальшых ремонтах

Уряд Ґміны Любін на своім сайті поінформувал, што Православна Парохія в Зимній Воді успішні розрахувала ся з дотациі на ремонт храму. Тогорічна інвестиция обнимала направу даху над поміщыньом ризниці од пілнічной страны, што коштувало близко 26 тис. 900 зл, з чого Ґміна Любін дофінансувала 23 тис. зл. В двох минулых роках парохія в Зимній Воді завдякы двом інчым дотациям од Уряду Ґміны могла вымінити цілый систем з рыннами на обєкті та выконати шор інчых робіт, м.ін. реновацию елевациі з одводніньом фундаментів ци направу сходів і деревяной повалы. Істория православной парохіі в Зимній Воді є безпосередньо повязана з акцийом «Вісла». Была она офіцийні ериґувана в серпни/авґусті 1947 рока о. митр. Йоаном Левярьом. Парохію на початку творило двадцет єден русиньскых родин з Бортного на Лемковині та двадцет родин Украінців з Холмщыны. До парохіі в Зимній Воді приналежат вірны з сусіднього Лісця, а дочырньом церквю є храм св. Михала Архангела в Михалові. Настоятельом православной парохіі в Зимній Воді є отец Славомир Кондратюк.

Молоды артисты оцінены

Вчера Стоваришыня «Руска Бурса» в Ґорлицях на антені радия ЛЕМ.фм оголосило результаты плястичного конкурсу для діти пн. «Ілюстрация до выбраного твору Меляніі Собин». В сумі надосланы были 33 рисункы, зроблены дітми в віку од 4 до 9 років, якы сут учениками шкіл в Бодаках, Высовій, Ґладышові, Пшемкові і Рашівці. Молоды артисты схоснували ріжны технікы – малюваня кредками, фарбками, вытинанкы, выклиянкы ци получыня ріжных технік, влучні з поміщаньом на образках елементів натуры (листя, мох, голузкы). Векшіст діти рішыла намалювати рисунок будучый інтерпретацийом верша «Земльо моя». Част діти выбрала твір «Прид весно», а двоє школярів одважыло ся інтерпретувати «Карпатскы верхы». В жырі конкурсу засіли: Катажына Тур-Марцішук та Анджей Жыґадло, якы подали, што выбір был барз тяжкій і до посліднього моменту сперечали ся о місця і выріжніня. I місце занял Aлександер Вонсік зо школы в Высовій, IІ місце: Татяна Кєц зо школы Рашівці, IІІ місце: Віктория Пєньонжек зо школы в Высовій. Листу дальшых выріжненых, з поясніньом оціны, і полну поконкурсову выставу найдете на портали lem.fm.

Ревітализация лемківской церковной співочой традициі

Вышла дальша платня од Мужского Камерального Церковного Хору Клірос, якій діє при Єпархіяльным Осередку Православной Культуры Ельпіс в Ґорлицях. То выданя, на котрым презентуваны сут церковны пісні в галицкых напівах, якы сут природны на Лемковині. Платня была выдана в рамках тогорічной едициі проєкту «Бортняньского поворот до Бортного». Звук был реґіструваный на зламі серпня/авґуста і вересня/септембра 2020 р. в просторах православной церкви св. Владиміра Великого в Креници. Платня вышла з благословліня владыкы Паісия, архієпископа перемышльско-ґорлицкого. В награнях взяли участ члены хору, православны священникы з Лемковины і вроцлавско-щеціньской єпархіі, отці Роман Дубец, Петро Пупчык, Ярослав Ґрич, Любомир Воргач і Славомир Сороканич, та світскы співакы Славомир Канюк, Укач Копча, Миколай Ґрич, Александер Клинковскій, Андрий Клинковскій, Павел Клинковскій і Адам Клинковскій. Гостинно выступил Петро Трохановскій. Награня і мастерінґ зробил Павльо Малецкій. Ґрафічный проєкт новой платні приготовил Давид Квока. Заміром выданя сесой платні была ревітализация лемківской церковной співочой традициі, котра помалы загыбат.

Амбулянс для ґлоґівского шпыталя

Повітовый Шпыталь в Ґлоґові збогатил ся о новый амбулянс. Поізд был презначеный головні до меджешпытального транспорту пациєнтів з цілого реґіону Мідьового Басену, в тым з обшыри ґміны Польковиці. Зато спомнена ґміна підперла закуп квотом 200 тис. зл. Торжественне переданя нового амбулянсу прошло вчера перед сідибом Шпытального Ратункового Одділіня. Амбулянс выпосаженый є в высокоспециялистичне ґратя до ратуваня і підтримуваня жытя. Понадстандардове выпосажыня, рідко стрічане в санітарных поіздах, становит зостав до механічной компресиі груди LUCAS.