Сумар дня на 16. листопада/новембра 2022 р.

Приносиме вам сумар медияльной ґрупы ЛЕМ.фм+ на ден 16. листопада/новембра 2022 р.

Будова крытой лыжной трасы в околицях Мушыны

Вертат тема будовы крытой лыжной трасы в околицях Мушыны. Думка явила ся уж близко 10 років тому, підперал єй бургомайстер Мушыны Ян Ґольба. Інвестиция была товды заблокувана Реґіональном Дирекцийом Охороны Середовиска (РДОС). Тепер тема будовы крытой трасы зас є актуальна, кєд же тым разом РДОС позитивно приняла проґнозу влияня на середовиско, тыкаючу інвестиций пропонуваных Звязком Креницко-Попрадскых Ґмін. Серед тых інвестиций є і крыта лыжна траса в околицях Злоцкого і Астрябика. Як подал для радия RDN бургомайстер Ґольба, рішыня тото одкрыват шансу на прирыхтуваня реченого проєкту. Треба змінити студиюм і плян просторового заґаздуваня та зробити чергову проґнозу влияня на середовиско, тыкаючу уж конкретно той трасы. Єдночасно завдякы рішыню РДОС отверат ся і скорша можливіст реактивациі і розбудовы лыжного вытягу в Щавнику.

Нове освітліня в лемківскых селах

Явили ся пляны тыкаючы нового освітліня в дакотрых лемківскых селах. Крениця отримала близко 500 тис. злотых з фонду для попеґееровскых ґмін на замонтуваня модерных уличных лямп в околичных селах. Дотля самоуряд вымінил стары світла на ледовы на крижівці в Мохначці Выжній, Полянах і по части в Чырній. Як подал бургомайстер Пьотр Рыба, на початку 2023 р. рушыт конкурс оферт на монтаж енерґоощадного освітліня в черговых місцях. В плянах на будучый рік єст выміна освітліня в Полянах, Бересті, Мохначці Выжній і по части Мохначці Нижній, Теличы, Мушынці, Перунці і в остатній части Чырной.

Технічный перегляд перед зимовым сезоном

Тырват технічный перегляд перед зимовым сезоном ґондольовой колейкы на Креницкій Яворині. Польскій Кабельный Транспорт передвиділ час на перегляд ваґоників ґондолі і цілой інфраструктуры желізниці до 9. грудня/децембра. Кєд хвиля буде одповідня, лыжна стация хоче одповідньо насніжыти трасу і зачати лыжный сезон 10. грудня/децембра. До того часу ґондоля не буде фунґувала, а на верх Яворины мож ся буде достати лем піше. Завершыл ся зато перегляд желізниці на Парковій Горі, де рушыла колейка на цілый зимовый період. Подібны технічны перегляды тырвали або тырвают в інчых гірскых осередках.

Kaszubopedia – компендиюм знань о Кашебах

Выстартувала Kaszubopedia – компендиюм знань о Кашебах. Вчера одбыла ся офіцияльна інавґурация того проєкту. В Кашебопедиі найдеме понад 500 госел тыкаючых Кашебів, м.ін. символів, мітів, памяти, вірінь і традиций. При рыхтуваню той інтернетовой енциклопедиі працувала ґрупа науковців. Выдавцями публикациі сут Кашебскій Інститут та Воєвідска і Містецка Публична Бібліотека в Ґданьску. На початку 2021 р. на основі проєкту «Гніздо ґрифа», якого думкодавцьом был проф. Цезарий Обрахт-Прондзиньскій, печатаный был «Словник кашебскых символів, памяти, традиций і культуры», написаный єденадцетьома авторами. Як подал проф. Обрахт-Прондзиньскій, наклад был выкупленый протягом парох місяців. Явили ся постуляты, жебы проєкт розвивати. Реализацийом тых постулятів єст як раз Кашебопедия. Є то одкрытый проєкт – його творці просят не лем хоснувати енциклопедию, але і зголошувати поправкы, ци ідеі новых госел.