Сумар дня на 16. лютого/фебруара 2022 р.

Приносиме вам сумар медияльной ґрупы ЛЕМ.фм+ на ден 16. лютого/фебруара 2022 р.

KGHM урухомит ядровы реакторы

Польскій мідьовый ґіґант підписал догваріня з американьском фірмом NuScale Power LLC в справі початку робіт над введіньом заавансуваных малых модуловых реакторів в Польщы. KGHM хоче до кінця 2029 рока урухомити першый реактор в технолоґіі SMR, котра єст альтернативом для традицийных ядровых реакторів, вельократні векшых. Електровня дозволит Польщы уникнути 8 млн тон емісиі діоксиду карбону на рік. На світі реализуваных є веце як 70 проєктів будовы малых ядровых реакторів, тзв. SMR, опрацуваных NuScale Power з Портлянд. KGHM, лідер в продукуваню міди і срібра, як першый в Польщы введе SMR. Його запотрібуваня то найменше штырі реакторы. Державный ґіґант закладат, што першый з них зачне фунґувати о вісем років.

Зміны в просторовым заґаздуваню Крениці

Радны Крениці підпорили резолюцию, котра зачынат процедуру вводжыня змін в пляні просторового заґаздуваня для цілого курорту. В рамках тых змін має быти вписана можливіст вознести бобслейовый тор на убочах горы Івонка. В минулым році Міністерство Спорту заповіло будову такого обєкту в інчым курортным місточку – в Душниках. Тырвают стараня, жебы в Креници вознести другу, подібну конструкцию. Як ґарантуют власти міста – Крениця є значучо ліпше докуметнацийні зрыхтуваня до такой інвестициі.

Будут урухомляти соспільну муштарню

В русиньскым селі Підгород в собранецкым окресі на Словациі хотят зорґанізувати соспільну муштарню, значыт місце до вырабляня мушту. Муштарня мала бы выникнути в сутеренах Культурного Дому. За добровільном оплатом каждый буде міг гын выробити мушт. Члены містного громадяньского здружыня, котре хоче муштарню зорґанізувати, сут охочы, жебы каждому заінтересуваному дармо вказати муштуваня, навчыти цілого процесу. Першом великом зорґанізуваном подійом буде соспільне муштуваня на осін того рока, вчас публичного самозбераня овочів в містным овочовым саді. Спомнена орґанізация публичным садом занимат ся од 2020 рока. За тот час повело ся зревітализувати 1,5 гектара садів і спричынити, што 90 старых овочовых дерев зас зачало давати овочы. Додатково посадили 20 новых дерев ріжных одмін.

Коли лікуваня сірковом водом і солянком?

В сусідніх Тяжковицях будут вертіти, жебы найти лікуючу воду в околицях Здройового Парку. Ґміна позыскала урядовы грошы на сфінансуваня ініциятивы. До кінця лютого/фебруара має быти розвязаный конкурс на реализатора робіт. По зробліню верчыня ґміна є уж готова до рыхтуваня інфраструктуры, котра доведе лікуючу воду до істнуючого Здройового Парку. Завдякы тому курортникы будут мочы лікувати ся сірковом водом і солянком. Верчыня буде важным кроком до утворіня в Тяжковицях чергового в Малопольщы курорту. Думкы о тым мал уж Ігнатий Ян Падеревскій, котрого двір находит ся на терені. Уж 100 років тому Падеревскій хотіл гын вознести санаториі, а Тяжковиці зробити великым курортом. На перешкоді станул брак згоды радных, жебы міг выкупити ділянкы під будову санаторий, што застопувало розвиток концепциі Падеревского.

Школіня з етнобізнесу

Стоваришыня «Skrawek Nieba» в Лоси просит взяти участ в проєкті пн. «Орґанізация школінь тыкаючых активізациі і едукациі в обшыри туристикы для жытелів обшыри Локальной Стратеґіі Розвитку». Обнимат она жытелів сельскых ґмін ґорлицкого повіту, м.ін. Ропы, Санковой ци Устя Руского. Тема школінь то примірно етнотуристика в пленері, кулінарна туристика, територияльный маркетірнґ, варштаты з обшыри природничой едукациі, схоснуваня локальной спадковины до творіня туристичных оферт. Стрічы пройдут в Мазярскій Загороді в Лоси.