Сумар дня на 16. лютого/фебруара 2023 р.

Приносиме вам сумар медияльной ґрупы ЛЕМ.фм+ на ден 16. лютого/фебруара 2023 р.

Пущаня для діти в Рускій Бурсі

В суботу, 25. лютого/фебруара в просторах Руской Бурсы в Ґорлицях пройде пущаня для діти. Буде музика, світла, забавы і конкурсы для наймолодшых. Серед тых забав напевно будут такы, якы знали нашы дідове, а не бракне і тых сучасных, котры знаны сут нашым дітям. Заплянували сме забавы і конкурсы при музиці, з музиком, а моментами і без. Сходити буде мож ся на 16.00 год. Вступне на пущаня для діти дармо, а на столах буде тото, што каждый принесе. Красні просиме – не лем наймолодшых, але і іх родичів! Деталі чытайте на нашым портали.

Музей Варголя буде ремонтуваный

В понедільок, 13. лютого/фебруара одбыло ся засіданя Заступительства Пряшівского Самосправного Краю. Крайскы посланці окрем інчого занимали ся схваліньом грошів на реконструкцию Музею Модерной Штукы Енді Варголя в Меджелабірцях. Музей Варголя од 2019 р. чекат на реализацию великого ремонту. Тот є не лем барз потрібный, бо будинок є в планным стані (затікат до него дощ через стріху), але так само має дати обєктови цілком нову дімензию. Грошы на проєкт перебудовы музею схвалили словацкы власти іщы в 2019 р. в цілковитій сумі 7,1 млн евро. До того пришла пандемія, збільшыня цін материялів і роботы, а і думкы новой влады цофнути цілу дотацию. Музей при днешніх цінах уж рахує з тым, же на модернізацию потреба понад 12 млн евро. Посланці согласно на засіданю схвалили фінансове покрытя реконструкциі музею в сумі 12,28 млн евро, з чого ПСК має до диспозициі од державы 5,1 млн і буде потрібувал іщы 7,18 млн дотациі.

Купуйте періодик Стоваришыня Лемків

Як сме уж інформували, кінцьом 2022 р. Стоваришыня Лемків выдало «Лемківскій Річник 2022». Публикацию, котрой головным редактором єст Севериян Косовскій, можете купити за символичне 10 зл в інтернетовым склепі Стоваришыня Лемків. Річник в першій черзі посвяченый єст 75. річници Акциі «Вісла». Найти в ним мож статю Богдана Копчы вєдно з тематичным атлясом про чысло выселеных. Петро Трохановскій пише в споминовій статі о 30. річници Лемківской Творчой Осени. Петро Медвідь прикликує подіі з 1992 р., коли проходил І Конґрес Русиньского Языка. Не бракує і голосу з Украіны – Анна Кырпан приближат творчіст маляркы Стефаніі Русиняк. Сут і дві польскоязычны статі – Даміяна Новака о Чытальнях Качковского на Лемковині і Северияна Косовского о лемківскых орґанізациях. В «Лемківскым Річнику 2022» найти мож тіж першый розділ автобіоґрафічной книжкы Ярослава Трохановского. Сут і річницьовы статі про жытя Павла Стефановского, Семана Мадзеляна і Ярослава Зволіньского.

Варштаты посвячены Новосільскому

Школа Іконописаня «Радруж» Украіньского Католицкого Університету во Львові при спертю Польского Інситуту в Кыйові орґанізує моноґрафічный курс Кристины Черні під назвом «Феномен Новосільского. Медже традицийом а аванґардом». В рамках того проєкту будут вказуваны выклады відео по польскы (з украіньскыма написами). В каждый другій понедільок місяця, зачынаючы од 20. лютого/фебруара до 29. мая в год. од 19.30 до 20.15 будут стрічы онляйн, вчас котрых буде мож давати своі звіданя і дискутувати на плятформі Zoom. Курс є дармовый. Орґанізаторы акциі припоминают, што Новосільскому зашмаряно, што його іконы сут неортодоксийны і незгідны з канонами. О тым і інчым будут як раз бесідувати вчас тых варштатів, якы проходят в рамках святкувань 100. річниці народин артисты.