Сумар дня на 16. серпня/авґуста 2021 р.

Приносиме вам сумар медияльной ґрупы ЛЕМ.фм+ на ден 16. серпня/авґуста 2021 р.

Дотациі для малопольскых курортів

На інтернетовым сайті Малопольского Воєвідского Уряду явила ся інформация о дотациях з державного буджету, якы были признаны дакотрым курортным ґмінам в воєвідстві. Середкы в высокости разом 8.409.000 зл. будут розділены медже 8 курортів. Понад 4.700.000 злотых трафит до Крениці, веце як мілийон до Мушыны і Щавниці, понад 600 тис. до Рабкы, більше як 300 тис. до Устя Руского і Пивничной, а неціле 30 тис. до Санковой і Кракова. Середкы мают быти схоснуваны м.ін. на текучы ремонты доріг, тротуарів і освітліня, дбаня о зелін, утриманя рекреацийой інфраструктуры, чыстоты і порядку на обшыри ґмін та зимове і літнє уртиманя доріг. Примірно, ґміна Устя Рускє отриманы середкы схоснує на утриманя пияльні, водного парку, боіска Орлик і ледовиска та Центру Реґіонального і Туристичного Продукту в Высовій.

Макєты неістнуючых церкви в Маґурскым Нацийональным Парку

Як інформує Маґурксій Нацийональный Парк, в Едукацийно-Музейным Осередку ім. Яна Шафраньского в Крампній до кінця серпня/авґуста мож обзерати макєты церкви. В вересни/септембрі будут они замонтуваны при фундаментах неістнуючых уж церкви в Свіржаві Рускій, Незнайовій, Тихани і Жыдівскым. Выстава макєт неістнуючых церкви єст реализувана в рамках проєкту «Біциґльом через погранича – природа, культура і істория на двох колесах» дофінансуваного через Проґрам Трансграничной Спілпрацы Інтерреґ Польща-Словация 2014-2020.

Тыжден Лемківской Культуры в Музею Істориі Кєльц

Музей Істориі Кєльц просит до участи в першій едициі нового проєкту презентуючого етнічны меншыны пн. «Своі незнаны». На інавґурацию зрыхтувано Тыжден Лемківской Культуры. Од середы 18. серпня/авґуста до неділі 22. серпня/авґуста пройдут выклады о істориі, культурі і звыках Лемків, проєкция фільму «Мій Никыфор» та концерт Аґаты Рымарович, яка разом з ансамбльом запрезентує м.ін. лемківскы і бойківскы пісні. Першого дня проєкту о сакральній штуці Лемковины оповіст Ярослав Ґємза, о ден пройде стріча тыкаюча церковного будівництва на Лемковині. Зато в пятницю, 20. серпня/авґуста, о 18.00 год. буде мож в Музею Істориі Кєльц послухати выклад др. габ. Олены Дуць-Файфер пн. «Лемкы. Будуче і текуче.». Полный проґрам подіі мож чытати на офіцийным вебсайті Музею. Вступне на більшіст подій дармо.

Европейскій Біговый Фестіваль в Креници

О нецілы три тыжні, в першый вікенд вересня/септембра, в Креници одбуде ся премєрова едиция Европейского Бігового Фестівалю, якого головным орґанізатором єст Фундация На Ратунок. До участи фурт мож ся іщы зголошувати. Зрыхтуваых єст 5 бігів, штырі о гірскым характері та єден уличный дистанс: Креницка Стівка (100 км), Ария Кєпуры (60 км), Поворот Никыфора (43 км), Солотвины Арена (20 км) і Малопольска Рекордова Десятка (10 км). Старт вшыткых бігів плянуваный єст на суботу 4. вересня/септембра тр. Фестівальови будут товаришыти дальшы атракциі такы як бігы для діти, ци тематичны прелекциі і варштаты.