Сумар дня на 16. жолтня/октобра 2024 р.

Приносиме вам сумар медияльной ґрупы ЛЕМ.фм+ на ден 16. жолтня/октобра 2024 р.

Аж 680 вольонтерів

В суботу 12. жолтня/октобра в Маґурскій Господі в Маластові одбыла ся торжественна стріча, котра была підсумуваньом ІХ едициі прятаня цмонтерів з часу І світовой войны. Акция тырвала од 10. до 12. жолтня/октобра і притягнула рекордове чысло волонтерів, бо аж 680 осіб. Акциі лідерувал Яцек Вітас, Презес Кружка Но 8 Гірского Клюбу «Орлы» при Варшавскій Коменді Поліциі, Польского Туристично-Краєзнавчого Одділіня Мазовша. Вчас стрічы запрезентувано ефекты робіт, бесідувано о значыню плеканя памяти помершых. Ініциятива з рока на рік здобыват штораз векше узнаня, становит тіж особливу плятформу для стріч представників локальных самоурядовых власти, війтів ґмін ґорлицкого повіту, медженародной орґанізациі Чорный Крест, малопольского воєводы і представників мадярской, австрийской і словацкой дипломаций.

ІІІ Підкарпатскє Форум Туристикы

В Ряшові під голсом «Мир і туристика» одбыло ся ІІІ Підкарпатскє Форум Туристикы. Бесідували м.ін. о тым, як діяти і заряджати, жебы не марнувати ідла, як вести стратеґічне плянуваня і проєктуваня екопродуктів, як основати і вести одповідальный туристичный бізнес в опертю о зрівноваженый розвиток туристикы, значыт в згоді з натуром і подорожничом цикавістю світа. Подію орґанізувал Маршалок Підпарпатского Воєвідства та Підкарпатска Реґіональна Туристична Орґанізация. Участниками были представникы самоурядів, позарядовых орґанізаций, підприємці, експерты і знавці од туристикы. Вручены были тіж нагороды для осіб і інституций, што прислужыли ся розвиткови туристикы в Підкапратскым Воєвідстві. Серед выріжненых нашли ся тіж вельолітні гірскы провідникы, якы статуі отримали за долголітню участ і особливе заанґажуваня в роботах Підкарпатской Еґзамінацийной Комісиі Гірскых Провідників. Выріжнены были м.ін. Губерт Оссадник, Роман Фродима ци Дорота Міхня.

Розвиток спілпрацы медже ґмінами Демєн а Санковом

5. жолтня/октобра в місцевости Демєн в жупі Гевеш в обводі Еґер одбыла ся стріча війт ґміны Санкова Малґожаты Малух з бургомайстром міста Демєн Ласлом Менгартом. Головном цілю стрічы было навязаня і розвиток спілпрацы медже обома ґмінами, в ріжных обшырях, з особливым увзглядніньом туристикы. Демєн то місточко на Мадярах, якє знане єст зо свойой богатой туристичной оферты, котра обнимат м.ін. термальны басены, чысленны виноградникы і люксусовы готелі. Порозумліня спілпрацы передвидує тіж затисняня реляций медже позаурядовыма орґаніциями, фірмами і мешканцями обох реґіонів.

Промоция творчости Михала Ковача

Заран в Новым Саді в просторах Заводу за Культуру Войводиньскых Русинів одбуде ся першый інтерактивный вечер поезиі з циклю «З культуром на Ты: бесіда о русиньскых діячах». Темом стірчы буде жытя і літературна творчіст Михала Ковача – прелекцию выголосит др Ана Рымар Симунович. Охочы будут мочы прочытати выбраны собом стихы Михала Ковача. Михал Ковач жыл в роках 1909-2005. Был педаґоґом, белетристом, редактором та культурным діячом серед войводиньскых Русинів, автором підручників для русиньскых шкіл в Войводині. Сучасны критикы уважают, што Михал Ковач є будівничым основ літературы войводиньскых Русинів. Писал поезию, оповіданя, драмы, комедиі, повісти. Творы Ковача были тлумачены на ріжны языкы, особливо держав бывшой Югославіі.