Сумар дня на 17. січня/януара 2024 р.

Приносиме вам сумар медияльной ґрупы ЛЕМ.фм+ на ден 17. січня/януара 2024 р.

Мариян Марко, директор ТАД в Пряшові, з президентскым одзначыньом

Мариян Марко, директор Театру Александра Духновича в Пряшові был нагородженый высокым державным одзначыньом – президентскым Прибиновым Крестом II. клясы за вынятковы заслугы в культурный розвиток Словацкой Республикы. Торжество вручаня державных нагорід прошло в неділю 14. січня/януара в Братиславі. Церемонія одбыла ся з нагоды 31. річниці выникнутя Словацкой Республикы. Президентка нагородила в сумі 33 особы з обшыри соспільного, культурного і спортового жытя, з того сім in memoriam. Нагороджены были і заслужены особы з Польщы, Чешской Республикы ци Мадяр, м.ін. Адам Міхнік, політичный діяч, публициста, історик. Отримал він Ордер Білого Подвійного Креста ІІ. клясы за заслугы во всестранный розвиток реляций медже Польщом а Словацийом. Мариян Марко то черговый Русин, котрого доцінила урядуюча президентка. Зузана Чапутова як перша зачала нагороджувати русиньскы особности. В 2021 році нагородила Василя Ябура, рік пізнійше Марию Мачошкову, а влони нагородженый in memoriam был Миколай Ляш. Мариян Марко то выхованец Полаты, акторством захопленый од наймолодшых років. З Театром звязаный перше як актор, а од 1999 р. є на посаді директора той інституциі. Є активный в русиньскым руху.

Хто остал бенефіциєнтом МВСіА в 2024 р.?

В минулым тыжни Міністер Внутрішніх Справ і Адміністрациі затвердил Выказ рекомендуваных експертами до дофінансуваня в 2024 році задач, котрых цілю є охорона, захованя і розвиток культуровой достоменности нацийональных і етнічных меншын. З приємністю можеме потвердити, што і того рока радийо і порталь ЛЕМ.фм будут фунґувати дале – найменше в такій обшыри як влони. Стоваришыню «Руска Бурса» в Ґорлицях Міністер признал дотациі на вшыткы зложены оферты. Окрем радия при Бурсі буде діял осередок культуры, ансамбль Терочка, театр Терка, буде тіж выданый черговый номер «Річника Руской Бурсы». Окрем Бурсы бенефіциєнтами міністерияльных дотаций з пулі лемківской части остали іщы: Товариство для Розвитку Музею Лемкіской Культуры, Лемківскій Ансамбль Пісні і Танця «Кычера», Стоваришыня Промоциі Лемківской Творчости «Серенча», Стоваришыня Лемко Тавер, Стоваришыня Лемків, Єпархіяльный Осередок Православной Культуры «Ельпіс» та Обєднаня Лемків. Не вшыткы зложены оферты достали дотациі, што чудує – серед одшмареных нашла ся м.ін. оферта Стоваришыня Лемків на печатаня двомісячника «Бесіда» ци діяльніст ансамблів Ластівочка, Ластівчата і Розтока. На тот момент не знатя, ци і в якій спосіб буде дале друкувана основна ґазета Лемків, яком є «Бесіда».

Товариство Любителів Лабівской Землі закінчыло діяльніст

По 20 роках істнуваня Товариство Любителів Лабівской Землі, постановом Суду, было поставлене в стан ліквідациі. Через рокы свойой діяльности Стоваришыня зреализувало шор проєктів, конкурсів і інчых ініциятив, котрых цілю была промоция реґіону, м.ін. печатало книжку авторства Целіны Цемпы пн. «Лабівскы Ескізы», публикацию «Лабівска Земля» ци альбум «Шляком церкви в ґміні Лабова». Стоваришыня активні вело тіж сайт орґанізациі, на котрым в закладці Знаны Лабовяне реґулярні являли ся біоґрамы ріжных персон, в великій мірі Лемків, якы в найвекшій ступени заселяли передвоєнну Лабову. Вынаходжыньом архівальных історий і іх опрацовуваньом занимала ся долголітня ведуча орґанізациі Целіна Цемпа. Серед описаных осіб нашли ся м.ін. др Даміан Савчак, о. Миколай Малиняк, о. др Василий Масцюх, Димитрий Вислоцкій, Нестор Жылич, о. Йоан Прислопскій, Александра Поляньска ци Анна з Вислоцкых Ільницка.

Кжыштоф Нестер заступцьом бургомайстра Польковиц

Новым заступцьом бургомайстра Польковиц остал Кжыштоф Нестер, самоурядовця з понад двадцетлітнім досвідчыньом. Діяч, знаный жытелям ґміны і польковицкого повіту зо свойой соспільной і політичной активности, тепер буде підперал соспільну част маґістрату. На функциі віцебургомайстра Кжыштоф Нестер буде заряджал такыма обшырями фунґуваня ґміны як здоровля, соспільна опіка, соспільна партиципация та спілпраца з позаурядовыма орґанізациями. Єдном з задач буде опрацувати нову концпецию фінансуваня спорту в ґміні. Жебы полнити функцию заступці бургомайстра, Кжыштоф Нестер зрюк ся мандату радного польковицкого повіту.