Сумар дня на 17. січня/януара 2025 р.

Приносиме вам сумар медияльной ґрупы ЛЕМ.фм+ на ден 17. січня/януара 2025 р.

Рік Русиньского Языка

На Словациі зачал ся Рік Русиньского Языка. В 2025 році Русины на Словациі припоминают собі 30 років од святочного выголошыня кодифікациі русиньского языка. Тота важна про Русинів історична подія одбыла ся 27. січня/януара 1995 р. в Братиславі. З той нагоды Округлый Стіл Русинів Словациі (ОСРС) выголосил на своім посліднім засіданю рік 2025 за Рік Русиньского Языка. Выголошыня кодифікациі русиньского языка потвердило самобытніст і посилило еманципацию Русинів. Завдякы ней днес русиньскій язык є языком театру, пресы, медий, хоснує ся в реліґійній сфері, Русины мают своє власне радийове і телевізийне высыланя, власный інститут на Пряшівскым Університеті, а русиньскій язык має своє місце і в освітнім процесі в школах. В Році Русиньского Языка будут членьскы орґанізациі ОСРС і партнеры орґанізувати ріжны подіі, жебы припомянути ювілей, але і пропаґувати русиньскій язык так внутрі русиньской соспільности, як і серед другых громадян Словацкой Республикы. О дакотрых з заплянуваных подій прочытате в дописі на нашым портали.

Продолженый надзір над недержавныма лісами в ґорлицкым повіті

Як поінформувал Ґорлицкій Повіт, середу 15. січня/януара тр. Ґорлицкій Староста Мирослав Валонґ підписал з представниками Надлісництв: Ґорлиці, Лося і Колачыці, анексы продолжыня до порозумлінь тыкаючых ведіня надзору над лісовом господарком в лісах не будучых власністю Скарбу Державы. Згідно з Законом о лісах з 1991 р. надзір над таком лісовом господарком веде староста, котрый може в дорозі порозумліня повірити ведіня в його імени справ в обшыри надзору, в тым выдаваня рішынь в першій інстанциі, надлісничому Державных Лісів. Повіряючый затверджат фінансовы середкы на тоты ціли. Згідно з законом, Державны Лісы сут зобовязаны служыти радом і допомагати приватным властителям лісів в ведіню лісовой господаркы. Обовязкы выникают з закону і для властителів, то м.ін. охорона лісів через формуваня балансу в лісовых екосистемах.

”Tри ябка” в Рускій Бурсі в Ґорлицях

В першый ден лютого/фебруара тр., в суботу, просиме до Руской Бурсы в Ґорлицях на пєсу ”Три ябка”. Представліня зачне ся о 17.00 год. В 2024 р. Стоваришыня “Руска Бурса” в Ґорлицях в рамках свойой діяльности вырішыло збогатити лемківску драматурґію, і попросило о написаня пєсы Станіслава Білого, вызначного словацкого автора. Білый в своій пєсі одкрыват універсальны вопросы, но делікатно іх прифарблює лемківскыма реалиями. Пєса была писана на конкретны три акторкы: в ролях выступлят Івона Іскра-Криницка, Наталия Малецка-Новак і Моніка Тылявска. Станіслав Білый пєсу написал і вырежысерувал. Драматурґію робил Петро Медвідь, котрый текст переклал на русиньскій язык. Адаптацию тексту на лемківскій стандард зробил Петро Криницкій. Музику скомпонувал Матуш Павлик, і зо сценоґрафійом поміг Мирко Пелехач. Пєса “Три ябка” могла быти зреализувана завдякы підпорі Міністерства Внутрішніх Справ і Адміністрациі. Веце на тоту тему чытайте в дописі на нашым портали.