Приносиме вам сумар медияльной ґрупы ЛЕМ.фм+ на ден 17. жолтня/октобра 2019 р.
Внет нове получыня Вроцлав-Ліґниця-Любін-Ґлоґів
Добра відоміст для жытелів Нижнього Шлеска. 15. грудня/децембра тр. Нижньошлезска Желізниця пустит першы получыня на трасі Вроцлав-Ліґниця-Любін-Ґлоґів. До той поры до Ґлоґова не мож было доіхати потягом через Ліґницю і Любін. В червци/юнію текучого рока было одкрыте получыня з Вроцлавя до Любіна, тепер тота єдна з найскорше розвиваючых ся желізницьовых компаній в Польщы плянує дальшый розвиток. До Ґлоґова потяг буде ішол спомянутом трасом, а при тым затримат ся в Рудній-Ґвізданів. Од половины грудня/децембра з Вроцлавя через Ліґницю, Любін аж до Ґлоґова денно буде ходило 8 потягів. Єдно получыня буде приспішене. Пут з Вроцлавя до Ґлоґова модерный склад переіхат в часі 1 год. 21 мин. На ґлоґівскій стациі не буде одкрытых білетовых кас, але буде білетомат Нижньошлезской Желізниці. Потягы як раз на тій трасі вертают по парунадцетрічній перерві.
Кружок СЛ в Ліґници просит на ювілейну стрічу
Кружок Стоваришыня Лемків в Ліґници на найблизшу суботу, 19. жолтня/октобра, просит на стрічу присвячену 30-літю істнуваня Стоваришыня Лемків – найстаршой повыселенчой лемківской орґанізациі в Польщы. Подія зачне ся о 17.00 год. В рамках стрічы в проґрамі заплянувано доповід. Выголосит ю долголітній член орґанізациі і учытель лемківского языка – Лука Возняк. Буде він розповідал до річницьового ювілею. Прелеґент зверне увагу і на інчы пункты в нашій істориі, котры были важны в будуваню нашой достоменности. По рефераті приде час на сводібну дискусию в виді дебаты. Орґанізаторы запрашают каждого, кому близка лемківска справа. Дискусия має тыкати головно актуального стану лемківской меншыны в Польщы в порівнаню до 1989 р. На стрічы видіти буде мож знимкы і документы з першых років діяльности Стоваришыня Лемків. Вступне дармо.
Як ратувати забыти цмонтері?
«Кым єс, тым я был, кым єм, тым Ты будеш» – під такым наголовком 23. жолтня/октобра в Варшаві одбуде ся подія присвячена темі ратуваня забытых цмонтерів. Хоц тема стрічы односит ся до загалу опущеных, закрытых або забытых цмонтерів на обшыри Польщы, то вписує ся она і в лемківскій проблем. Підниманы будут такы проблемы як тото, же были припадкы, коли дахто купил ділянку, котра фактично была перед роками цмонтерьом (а так было в примірі цмонтеря і села і Чертіжне). Інчый примір то будуваня обєктів на обшыри бывшых некрополий. Стрічу орґанізує Омбудсман Польщы Адам Боднар вєдно з Християньском Богословском Академійом. Проблем забытых цмонтерів односит ся в гідній мірі до Лемковины. Вельо з цмонтерів в селах, котры днес сут порожні, не мат потрібной опікы і не сут они модернізуваны.
Буковскій в Меджелабірцях і Свиднику
Полномічный влады Словацкой Республикы про нацийональны меншыны Ласло Буковскій в понедільок, 14. жолтня/октобра, был в Меджелабірцях і Свиднику. Як інформувал на своім фейсбуковым фанпейды, пришол до тых двох місцевости в ціли інформувати Русинів о іх правах і обовязках. По Меджелабірцях стрітил ся тіж зо старостами з реґіону Свидник. Повіл, што аж половина тзв. меншыновых самосправ не інформує своіх жытелів о іх правах што до хоснуваня языка меншыны. Буковскій бесідувал і о інчых недостатках, нп. о браку двоязычных урядовых формулярів. На стрічы повіл, же вшыткы, значыт більше як 600, меншыновы села і міста на Словациі возве направити недостаткы до даной даты. Кєд самосправы не будут інформувати о діях в тій обшыри, або того не зроблят нияк, уряд полномічного може наложыти і штрафы. В самым Свиднику положыл вінец на гробі будителя Александра Павловича. Вєдно з ним присутны были його партийны колеґы – Петро Крайняк і Михал Ґоріщак.
Коментарі