Сумар дня на 18. червця/юнія 2024 р.

Приносиме вам сумар медияльной ґрупы ЛЕМ.фм+ на ден 18. червця/юнія 2024 р.

Стріча полномічныка малопольского воєводы з меншынами

В четвер 13. червця/юнія полномічный малопольского воєводы до справ нацийональных і етнічных меншын Томаш Оцеткєвич стрітил ся з представниками меншыновых орґанізаций. Стріча прошла в сідибі Воєвідского Уряду в Кракові. Присутны были представникы ріжных меншыновых позаурядовых орґанізаций, што зареґіструваны сут в Малопольщы. Была репрезентация м.ін. жыдівской, украіньской, ормяньской, лемківской ци, в найвекшым чыслі – ромской соспільности. В стрічы участ взяла тіж Мирослава Копыстяньска, яка засідат в Спільній Комісиі Уряду та Нацийональных і Етнічных Меншын за меншынову страну. В часі стрічы полномічный Оцеткєвич, заповіл, што нова влада хоче быти присутна на подіях і ініциятивах орґанізуваных меншынами. Додал тіж, што для фінансового одтяжыня меншын доступны до орґанізуваня ріжных подій будут будинкы воєвідского уряду в Кракові, Тарнові і Новым Санчы. В навязаню до барже технічых справ тыкаючых фінансуваня активности меншын, полномічный припомнул, што Міністерство Внутрішніх Справ і Адміністрациі робит над змінами в реґуляміні, што тыкают складаня оферт на підпертя діяльности звязаной з охороном, продолжаньом і розвиваньом культуровой достоменности. Прошла і дискусия з представниками меншын, в часі котрой присутны могли заберати голос про текучы проблеми. Бесідували м.ін. о звекшаючым ся чыслі дискримінацийных інцидентів взглядом меншын. Полну реляцию зо стрічы можете чытати на нашым сайті.

Надходячы подіі в Карпатскым Університеті

Карпатскій Університет просит до участи в прелекциі на тему обрядів, звыків і традиций бывшых жытелів Бєщадів звязаных з літнім періодом. Выклад вюл буде Лукаш Байда – історик, реґіоналиста і бескідскій провідник. Прелекция пройде 20. червця/юнія о год. 16.30 в будинку Університету. Тоты, котры не будут мочы взяти участи особисто, по выкладі будут мочы переслухати го онляйн. Окремо Університет просит на першы вакацийны варштаты, котры тыкати будут ткацтва. Пройдут они од 5. до 6. липця/юлия, а записати мож ся до 25. червця/юнія через інтернетовый формуляр на фейсбуковым сайті Університету. Кошт варштатів то 100 зл. Подіі орґанізуваны сут в рамках реализациі проєкту «Розвиток інституцияльного потенциялу Фундациі Реґіонального Інституту.

«Малопольскы віночкы 2024»

Музей Дворы Карвациянів і Ґладышів разом з партнерами просят до участи в тогорічній едициі «Малопольскых віночків». Подія пройде 23. червця/юнія і зачне ся о 16.00 год. од выступів ансамблів Бескіды і Поляне. Ведены будут і кулінарны показы і варштаты реализуваны в рамках проєкту «Просиме до стола». В проґрамі подіі не бракує забав для діти і дорослых та спільного співаня і музикуваня. Ціліст закінчыт ся традицийным короводом і презентацийом собітковых звыків при огниску. Додатково ден скорше орґанізаторы просят на концерт Бескідского Квартету «Бескідскє Морскє Око».

«Літургічны кроі східнього і західнього Костела»

Окремо Музей Дворы Карвациянів і Ґладышів просит тіж на выставу «Літургічны кроі східнього і західнього Костела» презентувану в грекокатолицкій церкви в Бортным. На выставі презентуваны будут історичны, літургічны кроі з музейной збіркы та збірок парохій з ґорлицкой землі, хоснуваны головні в половині XX ст. Вернісаж выставы пройде 21. червця/юнія о год. 17.30, а експонаты мож буде обзерати до 31. серпня/авґуста.