Сумар дня на 18. липця/юлия 2023 р.

Приносиме вам сумар медияльной ґрупы ЛЕМ.фм+ на ден 18. липця/юлия 2023 р.

Православный праздник на Святій Горі Явір

В минулу середу, 12. липця/юлия православны Лемкы празднували на Святій Горі Явір Ден Святых Апостолів Петра і Павла. Традицийно, 33. уж раз, святкуваня попередило поломництво Православной Молодежы Перемышльско-Ґорлицкой Єпархіі, в котрым пішло понад 40 поломників. Торжества зачали ся 11. липця/юлия всеночном в церкви Покровы Пресвятой Богородиці в Ганчовій. Богослужыня очелювал архієпископ перемышльскій і ґорлицкій Паісий разом з епископом лодзкым і познаньскым Афанасийом, в асисті єпархіяльного духовенства і гости. Співал мужскій хор Клірос Єпархіяльного Осередка Православной Культуры «Ельпіс». В сам ден свята о 9.00 год. в церкви св. Михала в Высовій были привитаны єрархы – архієпископ люблиньскій і холмскій Авель, архієпископ Паісий і єпископ Афанасий. Вірны разом з духовенством вышли пак на Св. Гору Явір. Там владыка Паісий постриг в рясу послушника Монастыря в Высовій брата Андрия. Дальше служена была архієрейска Літургія. Співал хор православной парохіі в Креници, під дирекцийом Петра Трохановского. На конец ординарий єпархіі передал своі подякуваня, м.ін. війтови ґміны Устя Рускє і Раді Ґміны за зміну місцевого пляну заґаздуваня ділянкы, што дозвалят приступити до позыскуваня дальшых позволінь на будову православной церкви на Св. Горі Явір.

Грекокатолицкій одпуст в Пряшові

Вчера, 17. липця/юлия в Катедральным Соборі святого Йоана Крестителя в Пряшові одбыл ся архієпархіальный одпуст з нагоды праздника блаженного священномученика Павла Петра Ґойдича. Одпуст был в духу річниці, бо минуло 135 років од народжыня блаженного Павла Петра, котрый родил ся в 1888 р. в Рускых Пеклянах. Головным служытельом архієрейской літургіі был владыка Мілян Лях, помічный єпископ Братиславской Єпархіі, з ним служыл владыка Петро Руснак, апостольскій адміністратор Пряшівской Архієпархіі і братиславскый єпарха та владыка Мілян Хаутур, емеритуваный кошыцкій єпарха. Участ брало понад 60 священників. На кінци одслужено молебен над мощами священномученика в бочній капличці катедрального собору. В рамках божеской літургіі был установленый новый архімандрита в Пряшівскій Архієпархіі, котрым стал отец Марко Дурлак.

Анджеліна Джолі одкрыє працовню в бывшым будинку Енді Варголя

Будинок в Новым Йорку, котрый перше належал до Енді Варголя, і в котрым творил Варголь і Жан Мішель Баскія, взяла в аренду фільмова акторка Анджеліня Джолі. Хоче там створити социяльну ініциятиву «Atelier Jolie» – 8 років поміщена там буде працовня інтересуючых, а недоціненых ремісників з цілого світа. Енді Варголь купил будинок в 1970 р., а Баскія взял в аредну од него другій поверх. Обєкт побудуваный в 1860 р. уж перше мал цікаву історию. Єдным з його властителів был італияньскій ґанґстер Paolo Antonio Vaccarelli, знаный як Paul Kelly. Його ґанґ Five Points рекрутувал молодых мужчын, з котрых вельох стало знаныма злочынцями, м.ін. Johnny Torrio, Al Capone ци Lucky Luciano. Тепер в Ателіє Джолі своі творы будут мочы презентувати ремісникы, головно звязаны з ремеслом шытя облечынь і модом. Як подала сама акторка, то привілегія быти в тым просторі і зроблят вшытко што можут, жебы вшанувати і угонорувати дідовизну атристів соспільністю і креативніст. Для тых, котры не будут мочы долучыти до ініциятивы в Новым Йорку, проєктувана єст онляйнова соспілніст і творча простір.