Сумар дня на 18. листопада/новембра 2019 р.

Приносиме вам сумар медияльной ґрупы ЛЕМ.фм+ на ден 18. листопада/новембра 2019 р.

В сербскым парляменті вызвучал русиньскій язык

В четвер, 14. листопада/новембра, в сербскым парляменті вызвучал русиньскій язык. Посланкыня Нацийонального Згромаджыня Сербской Республикы Олена Папуґа промавляла до міністрів і посланців по русиньскы. Єй бесіду симультанні переводил Владимір Бодянец. Олена Папуґа дала звіданя, котры односили ся до недостатку підручників в языках нацийональных меншын, як і до стану фабрикы мороженых ярин «АБЦ Фуд» в Рускым Керестурі. То першый раз, коли в сербскым парляменті мож было почути симультанный переклад з русиньского на сербскій язык.

5.5 млм зл на вчыня професийной активности в ґорлицкым повіті

Більше як 5.5 мілийона злотых признано на вчыня професийной активности в ґорлицкым повіті. В Музею Польской Авіяциі в Кракові прошло вручыня інтенцийных писм на реалізацию проєктів. Ґорлицкій повіт одобрал інтенцийны писма на реалізацию од липця/юлия 2020 рока двох проєктів в обшыри вчыня професийной активности. Сут то проєкты: «Моя професийна активніст, моє будуче», реалізуваный Комплексом Шкіл Професийной Активности імени Казімєжа Пулаского в Ґорлицях, та «Інвестуєме в професийоналістів – ІІ едиция», реалізуваный Центром Професийного Вчыня в Ґорлицях. Част фондів буде перезначена на придбаня школами модерного нарядя і дидактичных помочы. Оба проєкты закладают підпору учеників в виді курсів і бранжовых школінь, компенсацийно-вырівнуючых занять з загальных і професийных предметів, карєровы порады в формі студийных одвидин в закладах професийной активноси, платных місячных вакацийных стажів та підпору учытелів в виді: курсів, школінь і бранжовых стажів, як тіж створіня обставин практичного вчыня на высокым технологічным і якістным рівни.

Фільм Кычеры в конкурсі обік професийных продукций

В днях 18.-22. листопада/новембра в Кєльцях буде проходил ювілейный ХXV Фестіваль Документальных Форм «НУРТ 2019». Того рока на конкурс надіслано 174 документы, з чого специяльна комісия выбрала 42 образы, котры закваліфікували ся до подіі. Серед номінуваных до конкурсовой части єст фільм під назвом «Там досправды жыли сме як в раю», котрого премєра одбыла ся осіню 2018 р. в Ліґници. Реалізувал го ансамбль Кычера. Як інформувал нашу редакцию ведучый ансамблю, а заєдно режысер образу, Юрий Стариньскій, фільм зберат першы успіхы. Оповідаюча про втрачене лемківскє щестя продукция буде вказувана в четвер, 21. листопада/новембра. Векшіст фільмів вказуваных на фестівали «НУРТ» то продукциі TVP, TVN або інчых професийональных студий. По каждым конкурсовым промітаню обуде ся стріча творців з публиком. Закваліфікуваны конкурсовы фільмы сут поділены на окремы катеґориі. Екранізациі будут оціняны жырі та публиком, котра буде так само голосувала по каждым з блоків. Найліпша продукция верне з Кєльц з нагородом «Подія НУРТ-у». Фіналова ґаля одбуде ся в пятницю, 22. листопада/новембра. «Там досправды жыли сме як в раю» то оповіданя о втраченым лемківскым світі, якій ненарушеный істнувал до початку ІІ світовой войны.

Лемківскій артиста на великым концерті в Carnegie Hall ЗША

З нагоды 100. річниці дипломатичных односин медже Польщом а Зъєднаныма Штатами Америкы Фундация Арс Актіва просит на 6. концерт в Carnegie Hall під наголовком «Polish-American Fantasy (Польско-Американьска Фантазия)» – Ґранд Ґаля ХХI Фестівалю Шопен і приятелі орґанізациі New York Dance & Innovations. Пройде він в суботу, 23. листопада/новембра, о 20.00 годині. На сцені выступит тринацетьох молодых музиків, в тым наймолодшый лавреат в істориі Меженародного Шопеновского Конкурсу в Варшаві, Тоні Йіке Янґ. В проґрамі творы Фридерика Шопена, Генрика Вєнявского, Джорджа Ґершвіна, Генрика Миколая Ґурецкого, Джона Вілямса та дві світовы прапремєры. Вечер вела буде польско-американьска акторка Лілияна Коморовска. Нa концерті почути буде мож тіж медже інчыма др. Мариюша Мончака, знаного во світі гушляря з лемківскыма коренями, артистичного директора Фундациі Арс Актіва. Хто хоче быти на концерті, має нагоду купити білет з 20% знижком при схоснуваню коду FRI32682 на сайті arsactiva.org.

Лавка Андриівка-Малый Липник

Тырват будова роверовой лавкы над ріком Попрад, котра получыт Андриівку в ґміні Мушына з русиньскым селом Малый Липник по словацкій страні. Єдночасно проходит будова лавкы, котром буде мож піше або ровером достати ся з Милика до Леґнавы. Окрем того, на трасі выбудуваны будут місця обслугы, з задашыньом, стояками на роверы та самообслуговом стацийом направ. Актуально любителі роверовой туристикы та одвиджяючы Мушыну мают до диспозициі близко 230 км ознакуваных роверовых пути ведучых през ґміну. Вшытко в рамках медженародного проєкту EuroVelo11. Передвидуване закінчыня робіт над лавком Андриівка–Малый Липник то конец червця/юнія 2020 рока. Подібна лавка получыла Жеґєстів і Сулин літом 2015 рока.