Сумар дня на 18. мая 2021 р.

Приносиме вам сумар медияльной ґрупы ЛЕМ.фм+ на ден 18. мая 2021 р.

«SĘK YOU – так ся гев бесідує» – промуюче госло ґміны Санкова выбране

Власти ґміны Санкова представили результаты конкурсу на промуюче госло. Задачом участників было переслати короткій текст, котрый найліпше оддаст красу ґміны. Як повіла Малґожата Малух, війт ґміну Санкова, в конкурсі взяло участ вельох жытелів, што барз втішыло, а аж і зачудувало власти. Конкурсова комісия нагородила три найбарже інтересуючы пропозициі з близко 60 надосланых. На першым місци нашло ся госло «SĘK YOU – так ся гев бесідує». Зо взгляду на так великє заінтересуваня конкурсом власти ґміны рішыли оголосити додаткове голосуваня, тым разом в інтернеті. На сайті ґміны находят ся вшыткы пропозициі, котры были посланы до комісиі і з котрых мож выбрати своє найліпше госло.

LXXIII засіданя Спільной Комісиі Уряду та Нацийональных і Етнічных Меншын

Заран, 19. мая пройде LXXIII засіданя Спільной Комісиі Уряду та Нацийональных і Етнічных Меншын. Стріча зачне ся о 10.00 год. Бесіды ведены будут о «Проґрамі социяльной і громадяньской інтеґрациі Ромів в Польщы на рокы 2021-2030» ци реализациі задач з 2020 рока, котры причынили ся до розвитку і захованя достоменности меншын. Порушена тіж буде тема дотаций на реализацию задач в 2022 році. Комісия дискутувала буде і тему тырваючого Нацийонального Повселюдного Списуваня Жытелів і Мешкань, а тіж подана буде інформация о стані прац над модифікацийом системы меншыновой освіты і діянях підниманых Міністерством Едукациі і Наукы.

Потягом з Ясла до Крениці, а по дорозі пристанок в Мушыні

В вакацийным періоді урухомленый буде вікендовый потяг реляциі Ясло-Крениця та Тарнів-Ясло. Потяг курсувал буде од 3. липця/юлія до 28. серпня/авґуста. В реляциі Ясло-Крениця ішол буде через Мушыну, і з той нагоды власти ґміны Мушына зрыхтували для туристів подорожуючых желізницьом «Пакєт подорожника». В выбраных реставрациях і атракциях курорту, по вказаню желізницьового білету, буде мож заплатити менче. На сайті Уряду Міста Мушына находит ся полный список місц, котры берут участ в акциі.

Тепер мож обзерати найкрасшы обєкты Пути Деревяной Архітектуры Малопольщы з хыжы

Малопольска Туристична Орґанізация просит на наступны одтинкы циклю фільмів, в котых презентує 20 найкрасшых обєктів Пути Деревяной Архітектуры Малопольщы. Фільмы возникли в формі анімациі завдякы лясеровому зосканованю обєктів. Уж тепер мож видіти три з обшыри Лемковины, православну церков Покровы Пресвятой Богородиці в Волівци, костел свв. Филипа і Якова в Санковій і грекокатолицку церков Різдва Пресвятой Богородиці в Лоси.

Стадо жубрів в Мучным побільшыло ся

На конец добра новина з Бєщадів. В показовій загороді жубрів в Мучным пришло на світ перше того рока теля. О народинах нового члена стада Надлісництво поінформували туристкы, котры в тым часі находили ся в загороді. З того взгляду будут они мати можливіст надати імено новій членкыни стада. На тепер стадо в загороді рахує 9 жубрів.