Сумар дня на 18. жолтня/октобра 2024 р.

Приносиме вам сумар медияльной ґрупы ЛЕМ.фм+ на ден 18. жолтня/октобра 2024 р.

Лемковина Ультра Трейль 2024

Уж в тот вікенд 19. і 20. жолтня/октобра на Лемковину придут спортовці і аматоры з цілой Польщы і не лем, жебы взяти участ в тогорічній 11. едициі Лемковина Ультра Трейль. Біговый фестіваль тішыт ся великом популярністю. До каждой едициі зголошує ся штораз то більше участників. І того рока в змаганях возме участ чысленна репрезентация лемківской меншыны, медже нима врпавлены уж бігачы, якы од років гордо репрезентуют Лемків в літаню по бескідскых вершках і долинах, як і тоты, котры першыраз будут провірювати своі силы. Лемківска екіпа зъіхат ся з цілой Польщы, найчысленнійше резперентуваный буде Нижній Шлеск. Бюра змагань были вчера одкрыты в Коросні і Креници. Того рока беручы участ в акциі мали можливіст записати ся на єдну з шестьох трас долгости: 10, 30, 48, 100 або 150 км. Участникы будут стартувати з Крениці, Івонича, Гыровой, Рыманова і Команчы, а першы выстартуют уж о 1.00 год. в ночы в суботу з креницкого дептака. Мета вышткых трас і вручыня грамот буде в Команчы.

Крениця плянує велику інвестицию

Ґміна Крениця рыхтує ся до змін пляну просторного заґаздуваня, котрый уможливит локализацию санечково-бобслейово-скелетонового тору на горі Івонка. Будова професийонального штучно мороженого тору мала бы коштувати аж 150 млн злотых. Як пояснят бургомайстер Крениці Пьотр Рыба, зміны тыкают усталінь з Реґіональном Дирекцийом Охороны Середовиска. Плян мал бы быти принятый іщы в тым році, што буде основом до початку проєктовых прац. В будучым році урядникы могли бы зачати стараня о фінансуваня проєкту тору разом з позволіньом на будову. В звязку з великыма коштами будовы тору, рішыня о його будові буде мусіло быти підняте польскыма властями. Кєд поведе ся поставити такій обєкт в Креници, буде там мож орґанізувати найважнійшы змаганя в санечкарстві, скелетоні і бобслеях, аж і Чемпіонат Світа ци чемпіонат світа.

Выстава творів Соні Трохановской

Вчера в Містецій Публичній Бібліотеці во Влодаві одбыл ся вернісаж выставы прац молодой лемківской артисткы Соні Трохановской. Соня має 13 років, як сама гварит – до рисуваня од намолодшых років заохочал єй няньо, выдатный артиста. Єй улюбленыма темами до рисуваня, малюваня сут портреты і краєвиды, особливо такы вказуючы выдумане ньом роботичне місто. Выставу пн. «Просторы фантазиі» мож обзерати в Ґалериі на Плянтрі до 8. листопада/новембра тр.

Акция прятаня цмонтеря в Новым Лупкові

Як поінформувал Ґмінный Осередок Культуры в Команчы, Стоваришыня серед Приятелів просит вшыткых охочых до помочы при осіннім прятаню цмонтеря в Новым Лупкові. Акция пройде в неділю 27. жолтня/октобра. Початок о 10.00 год. Орґанізаторы просят забрати зо собом потрібне нарядя. Особливо запрашают діти, буде огниско і кісто.

Загальнопольскє Товариство Охороны Птахів одповіст на звіданя про Нацийональны Паркы

Загальнопольскє Товариство Охороны Птахів припоминат, што дальше мож выполнити онляйнову анкєту на тему фунґуваня Нацийональных Парків, будучых найвысшом в Польщы формом охороны природы. На основі звідань і коментарів переданых до кінця жолтня/октобра орґанізация прирыхтує одповіди і перешле до заінтересуваных, a пак омовит найпопулярнійшы темы підчас специяльного вебінару. Дрібниці і мотузок до анкєты найдете на нашым портали.