Сумар дня на 19. мая 2023 р.

Приносиме вам сумар медияльной ґрупы ЛЕМ.фм+ на ден 19. мая 2023 р.

Близко півторы мілийона злотых за гектар ділянкы в новій Зоні Економічной Активности в Ґорлицях 

Уж близко рік тырвают працы при будові новой Зоны Економічной Активности в Ґорлицях. На просторі ок. 5 гектарів возникло 11 інвестицийных ділянок достосуваных до потреб інвесторів. Тепер місто оголосило конкурс оферт на іх продаж. Одбуде ся він в формі ліцитациі. За заряджыньом бургомайстра Ґорлиц Рафала Куклі, стартова ціна найвекшой з ділянок, яка має ок. 1,07 га, то 1,8 млн злотых брутто. Меншы ділянкы о просторі 0,71 га были выставлены до ліцитациі за 1,2 млн. Стартова ціна ок. пілгектаровых ділянок то мілийон зл брутто. В примірі найменшых ділянок маючых лем по парунацет арів стартова ціна не перекрачат 300 тис. злотых. Кєд поведе ся продати вшыткы ділянкы лем по стартовій ціні, то до касы міста вплыне близко 8,5 млн злотых. Як заінтересуваных ліцитацийом найде ся веце, квота може значучо ся збільшыти. Згідно з пляном просторного заґаздуваня ділянкы сут презначены під терены продукцийной і услуговой забудовы, складів і маґазинів.

«Бескід без кіту» на дощках театрґалериі STUDIO в Варшаві

В неділю 4. червця/юнія в Варшаві буде гостила Вельопоколіньова Ґрупа Племя з Устя Руского, яка выступит зо спектакльом «Бескід без кіту». Одбуде ся він о 16.00 год. на Великій Сцені ім. Юзефа Шайны театрґалериі STUDIO. Пєса возникла в 2021 р. на основі книжкы «Бескід без кіту» авторства Мариі Стшелецкой. Театральном опікунком ґрупы і авторком сценария єст Моніка Бабуля, о музичну оправу задбал Мирослав Боґонь, а вокально рыхтувала ґрупу Юлия Дошна. Місце акциі пєсы то давне лемківскє село в 60. роках ХХ столітя. Молоде дівчатко одвиджат бабцю Теклю, Лемкыню, котра оповідат о традициях і вчыт лемківскых пісен. Бесідує о тяжкій долі лемківского народу, котрый был змушеный лишыти свою землю в 1947 р. в Акциі «Вісла». Кєд хочете видіти «Бескід без кіту» в Варшаві, треба ся поспішыти, бо остало уж бодай лем пару свобідных місц.

БНП підсумувал своі діяня в рамках Проґраму для Бєщадів

Як поінформувал Бєщадскій Нацийональный Парк, 15. мая в Лютовисках прошла конференция підсумовуюча 5 років фунґуваня Проґраму для Бєщадів. Діяня в рамках проґраму зосереджают на 4 головных частях – Бєщады мают быти близкы і приязны для жытелів, а при тым зелены і одкрыты. Вчас конференциі директор БНП запрезентувал найважнійшы проєкты і тематичны інвестициі вписуючы ся в компонент «Зелены Бєщады». Сут то м.ін. активна охорона загороженых ґатунків і сідлиск в нелісовах екосистемах БНП, зрыхтуваня комплексовой ревітализациі пішых шляків БНП цілю зміцніня охороны іх природничого середовиска, ци захованя біоріжнорідности Ветлиньской Полонины через охорону загороженых ґатунків перед неґативным влияньом туристикы. Сут то тіж 4 мікропроєкты в рамках Проґраму Трансграничной Спілпрацы Інтерреґ Польща – Словация і проєкты тыкаючы реализациі едукацийных проґрамів для Підкарпатя.

Зміны в Музею Енді Варголя в Пітсбурґу

Музей Варголя в Пітсбурґу вызначыл нового головного куратора. Аарон Ґарві функцию тоту обойме літом 2023 рока. Робота нового куратора зосереджат ся головні на сучасній штуці, будуваню спільноты через творіня публичных проґрамів ци орґанізуваню выстав в альтернативных просторах. Як подал Аарон Ґарві, жде на можливіст заанґажувати наступну ґенерацию ріжнорідных артистичных голосів в передаваня спадковины по Варголи, Музеях Kaрнеґі, міста Пітсбурґ. Більше про нового куратора прочытате в дописі на нашым портали.

Джерело фотоґрафіі: teatrstudio.pl