Сумар дня на 19. вересня/септембра 2023 р.

Приносиме вам сумар медияльной ґрупы ЛЕМ.фм+ на ден 19. вересня/септембра 2023 р.

Ретро потяг зас затримат ся в Ґорлицях і Бічы

Того рока забытковый табір рушыт в трасу давной Ґаліцийской Трансверсальной Желізниці в неділю 24. вересня/септембра. Подорожуючы будут іхати потягом зложеным з забытковой паровой локомотивы з 1946 р. та історичных складів ваґонів з років 30-60 XX ст. Табір свою подорож зачне на стациі Новый Санч, а пак затримат ся в Пташкові, Ґрибові, Строжах, Ґорлицях і доцільовым місци – Бічы, перлині Малопольщы. В пляні подіі находит ся м.ін. звиджаня середвічного міста, вступ на выставу на желізничным дворци, музичны выступы в потягу і на стациях, ци деґустация реґіональных страв. Додатково в часі звиджаня Біча потяг выконат додатковый курс на трасі Біч-Ґорлиці-Біч, так што участникы акциі будут мочы видіти оба міста. Полный розклад трасы потягу і плян подорожы находят ся на інтернетовым сайті Малопольскых Пути Желізничной Туристикы.

«Новосільскій. В сотну річницю народин»

Нацийональный Музей в Кракові просит на стрічу зо штуком Юрия Новосільского, котрый єст патроном 2023 рока. В музею презентувана єст часова выстава пн. «Новосільскій. В сотну річницю народин», на котрій вказуваны сут творы артисты зо збіркы музею, в тым рідко презентуваны працы на папери. Акция пройде 22. вересня/септембра і разом з провідником мож буде видіти так часову выставу в Нацийональным Музею, як і працы презентувны в Ґалериі Польской Штукы XX i XXI ст. Як інформуют орґанізаторы акциі, то рідка нагода до посмотріня на творчіст Новосільского в шыршым контексті польской штукы II половины XX ст., серед прац такых артистів як Кантор ци Ярема. Звіджаня зачне ся о год. 16.30 і презначене єст лем для дорослых участників, кошт то 50 зл. Дрібниці найдете на інтернетовым сайті Нацийонального Музею в Кракові.

Новый ведучый Выконного Выбору

Обчаньскє Здружыня молоды.Русины поінформувало, што на остатнім XVI вырочным соймі выбрали нового ведучого і членів до Выконного Выбору. Традицийно сойм прошол в недільній части проґраму Табору з молодыма по русиньскы  в Малым Липнику. Окрем членів орґанізациі в подіі участ взяли тіж м.ін. Гелена Діцова з Русиньской Оброды на Словациі ци Зденка Цітрякова з Інституту Русиньского Языка і Культуры в Пряшові. Окрем підсумуваня та оціны діянь веденых протягом рока овыбраны были председа і члены Выконного Выбору. Ведучым на дальшы два рокы остал дотеперішній председа Марек Гребік.

«Єдніст в спорті»

Православна парохія св. Тройці в Ґорлицях орґанізувала шаховый турнір в рамках XVIIІ Екуменічной Спортовой Олимпіяды «Єдніст в спорті». Як поінформували на своім фейсбуковым сайті, охочых брати участ в подіі не бракувало, а в ґрупі спортовців нашли ся тіж тоты з заграниці. Участ в конкурсі взяли члены клбів м.ін. з Ґорлиц, Коросна, Бардийова, Лска ци Вєлічкы. Змаганя прошли аж в 8 катеґориях. В каждій з ґруп нагороджено трьох найліпшых участників. Орґанізация подіі была можлива завдякы дофінансуваню Малопольского Воєвідства і Міста Ґорлиці.