Сумар дня на 2. грудня/децембра 2021 р.

Приносиме вам сумар медияльной ґрупы ЛЕМ.фм+ на ден 2. грудня/децембра 2021 р.

В суботу наше свято

Ближыт ся 103. річниця фльориньского віче, якє дало початок Рускій Народній Республиці Лемків. 5. грудня/децембра єст і нашым нацийональным святом – Дньом Русинів в Польщы. З той нагоды Стоваришыня «Руска Бурса» в Ґорлицях і Стоваришыня Лемків просят вшыткых до спільного святкуваня. Святкуваня зачнут ся во Фльоринці, жебы в долинці перед плебанійом, де перед роками зобрали ся нашы предкы на віче, вшанувати іх памят і ідею Республикы. Дальша част тогорічного Дня Русинів в Польщы пройде в ґорлицкій Рускій Бурсі. Зачне ся она о 15.00 год. Др Анна Вільк выголосит выклад пн. «Довкола бадань над історийом і достоменністю Лемків». Пак буде артистична част, в якій молода композиторка з чужыны, Дария Текля Кузяк, заграт свій авторскій концерт пн. «Од традициі до сучасности». Сердечні вшыткых просиме до спільного празднуваня.

Русиньскы еліты о положыню Русинів

26. листопада/новембра 2021 р. в Мукачеві одбыл ся округлый стіл на тему «Роля містных еліт і інтеліґенциі в розвитку державы». Округлый стіл был зорґанізуваный головом Закарпатского Одділіня Общества Адвокатів Украіны Ларисом Хольмогоровом і головом Рады Адвокатів Закарпатской Области Олексийом Фазекошом. В подіі взяли участ знаны адвокаты з области, депутаты Закарпатской Областной Рады, журналисты, блоґеры і гості. Медже участниками были і представникы русиньского руху на Украіні, наприклад шефредактор порталю «Фенікс – Слово» Штефан Сікора і голова Народной Рады Русинів Закарпатя Євген Жупан. Тоты при округлым столі одкрыли і тему Русинів і референдуму з 1. грудня/децембра 1991 р., котрого результаты доднес не были выполнены. Євген Жупан звернул увагу на проблем того, же Русины не сут вызнаны на Украіні.

Радийова стріча в Рускій Бурсі

В найблизшу суботу, 4. грудня/децембра, редакторы нашого радия зыйдут ся на стрічы в Рускій Бурсі в Ґорлицях. Єй цілю буде підсумувати діяльніст медияльной ґрупы ЛЕМ.фм+ за остатній рік. Будеме бесідувати так само о плянах на будучый, 2022 р. і о тым, што можеме зліпшыти в фунґуваню радия і інформацийного порталю. Того рода стрічы стараме ся робити парураз до рока, жебы бесідувати про потребы нашых слухачів і інчы справы повязаны зо штоденном діяльністю. Зыйдут ся редакторы з Лемковины, Пряшівщыны, Підкарпатской Руси і чужыны.

Вмерла Ена Фарбанец (Лазорчік)

Отримали сме смутну віст з Америкы. 30. жолтня/октобра 2021 р. на прекрасным, сотным році жытя вмерла Ена (Анна) Фарбанец. Вродила ся она 1. мая 1921 р. в Тыляві в родині Штефана Шваглі. Мати походила з Завадкы Рыманівской (з роду Барнів). Покійна не была выгнана вчас акциі «Вісла». Ена Фарбанец была голосом єдного з культовых джінґлів нашого радия, якій был награный нашым редактором Павльом Малецкым в часі екскурсиі в 2012 р. на Фльориду. То єден з першых голосів – перерывників, реклямуючых перше лемківскє радийо [fragment jingle].