Сумар дня на 2. серпня/авґуста 2024 р.

Приносиме вам сумар медияльной ґрупы ЛЕМ.фм+ на ден 2. серпня/авґуста 2024 р.

44. Лемківска Ватра на Чужыні

Уж днес в Михалові на Нижнім Шлеску загорит 44. Лемківска Ватра на Чужыні, якой орґанізатором є Стоваришыня Лемків. Проґрам зачне ся о 19.00 год. Першыраз почестна функция положыня огня припаде трьом Фльоринчанам – теперішнім і бывшым жытелям Михалова: Іванови Дзядикови, Михалови Канючкови і Осифови Лучківцьови. Днес на сцені видіти буде мож такы ансамблі як Серенча, Бурян і Демай. Суботній проґрам зачне ся о 12.00 год. Выступлят м.ін. Лемко Тавер, Надія, Інтраде і Лемкус. Специяльныма гістми будут два ансамблі з Пряшівской Руси, якы запрезентуют автентичный русиньскій фольклор з Уличской Долины. То Полонина і Стужыця, якы в рамках свого выступліня вкажут і обряд русиньского весіля. В суботу передвиджено і шор конкурсів, спортовых змагань і інчых акций.

Выклады і бесіды на 44. Лемківскій Ватрі

Припоминаме, што окрем концертів в суботнім проґрамі Ватры заплянувано і стрічы – доповіди, якы будут проходити в Шатрі Бесід. О своім проєкті «Біла Вода – Біль непамяти» оповідят краківскы студенты Домініка Цєпляк і Каміль Федериґа. Пак прелекцию выголосит Даміян Новак з Музею Бічской Землі. Темом буде доля церкви на Лемковині од ХІХ до ХХІ ст. Выклады, а при тым і інчы свобідны бесіды будут проходити в специяльно зрыхтуваным шатрі, котре напевно найдете на ватровиску. Не бракне і нас – редакторів радия ЛЕМ.фм. Як каждого рока будеме для Вас. Будете годны придбати цікавы лемківскы книжкы, цедечка, кошелькы і інчы ґаджеты.

Свято Лосяньскых Мазярів

А уж в найблизшу неділю 4. серпня/авґуста в Мазярскій Загороді в Лоси, одділіню Музею – Дворы Карвациянів і Ґладышів в Ґорлицях, одбуде ся чергова едиция Свята Лосяньскых Мазярів. Тогорічном головном темом сут Мастеры Традициі – особы підтримуючы унікатны професиі і знаня. Серед мастерів будут: лжычкар, дегтяр, зілярка, бібулкарка, кривулькарка, каменяр, гафтярка. В проґрамі сут концерты, показы, варштаты, конкурсы і вельо інчых атракций. В рамках концертів Мастерів Традициі запрезентуют ся Ян Малиш з учениками та Юлия Дошна і Руты Увіты. Початок подіі о 13.00 год.

Ремонт цмонтеря в Устю Рускым

В липци/юлию тр. війт ґміны Устя Рускє підписала догваріня о дофінансуваня ремонту цмонтеря з І світовой войны Вірхне 61. Внутрішній терен цмонтеря разом з гробами і крестами та одтинковым огороджыньом зо слупків і парканів был в остатніх роках одновленый, одтвореный і законсервуваный. Актуальный закрес робіт обнимат однову камінного муру разом зо стіном центрального памятника (в тым выміну ґонтового покрытя) та выконаня зовнішнього дренажу. Цілковитый кошт задачы то понад 62 тис. злотых, з чого понад 46 тис. походит з середків Міністра Культуры і Нацийональной Спадковины – Фонду Промоциі Культуры, а близко 16 тис. з середків Малопольского Воєводы.

В Малопольщы хотят створити новы курорты

Члены парляментарного ансамблю до справ розвитку Малопольщы бесідували з маршалком малопольского воєвідства про одкрытя специяльного фонду, котрый поможе створити новы курорты на обшыри воєвідстца. Єдным з самоурядів, котрый мал бы отримати спертя, єст ґміна Лабова. Середкы з буджету Маршалківского Уряду мали бы быти переданы м.ін. на ґеолоґічны верчыня і досліджыня. В ґміні Лабова нашли джерела, але жебы вшытко потвердити потрібне єст іщы близко 2-2,5 млн злотых на верчыня і баданя. З фонду могли бы корыстати і другы малопольскы самоуряды, што мало бы ся причынити до іх розвитку.