Сумар дня на 2. вересня/септембра 2021 р.

Приносиме вам сумар медияльной ґрупы ЛЕМ.фм+ на ден 2. вересня/септембра 2021 р.

До кінця вересня тырват Нацийональный Повселюдный Спис

Припоминаме, што іщы лем до кінця вересня/септембра 2021 р. тырват Нацийональне Повселюдне Списуваня. Заохочаме вшыткых, жебы ся списали, кєд іщы того не зробили. Результаты спису будут цінны не лем для державы, але в примірі нацийональных і етнічных меншын мают великє значыня, кєд же м.ін. мы – Лемкы – можеме раз на 10 років провірити чысленніст нашого народу в Польщы. Будме горды на нашу лемківску достоменніст і на рідный язык. Жебы заохотити вшыткых, хто має лемківскє походжыня, деклярувати лемківску нацийональніст, сут в Польщы ведены дві кампаніі – общерусиньска «СмеЛемкы/Сме Русины» і локальна од молодежы з Вроцлавя «ЯЛемко». Деталі про спис чытайте на сайті Головного Статистичного Уряду.

О тыжден ґаля концерт в Ґорлицях

Уж о тыжден, в четвер – 9. вересня/септембра, на ґорлицкым рынку пройде вынятковый концерт. Вынятковый зато, што буде то празднуваня 30. річниці реактивациі Стоваришыня «Руска Бурса» в Ґорлицях. В проґрамі подіі є выступ  ґрупы Терочка та ансамблю ПУНА з Пряшова, єдиного в світі професийного ансамблю, якій занимат ся презентуваньом русиньского фольклору. Важным пунктом концерту буде вручыня посмертні признаного Богданови Ґамбальови, вельолітньому ведучому Руской Бурсы і єдному з ініцияторів реактивациі орґанізациі, Золотого Креста Заслугы – одзначыня признаване є президентом Польской Республикы. Концерт зачне ся о 16.00 год. Вступне дармо. В разі дощу концерт одбуде ся в Ґорлицкым Центрі Культуры. Сердечні просиме!

Стріча з фотоґрафом Лемковины

Днес в Новогуцкым Центрі Культуры в Кракові пройде вернісаж фотоґрафічной выставы пн. «Лемковина» авторства Збіґнєва Подсядло. На стрічы буде мож побесідувати тіж з автором знимок. Подсядло то фотоґраф, якій консеквентні выберат чорно-білу фотоґрафію. Характеристичным є для него хоснувати гармонійны пропорциі і выважены контрасты медже білым і чорным. «Лемковина» то в заміріню автора выставы подорож в глубину істориі і по обшырях сучасности. Видимым елементом векшой части знимок є крест – символ смерти, але і одраджаючого ся жытя і надіі. Автор удокументувал штоденне жытя Лемків, імаючы послідній момент, коли в краєвиді мож іщы найти хыжы. Початок вернісажу о 18.00 год.

Грекокатолицкє поломничество на Св. Гору Явір

В суботу, 18. вересня/септембра, пред праздником Різдва Пресвятой Богородиці, выйде грекокатолицкє піше поломництво в 96. річницю першых обявлінь на Святій Горі Явір. Поломництво зачне ся в Баници при Ізбах. О 9.00 год. буде служена літургія в місцевій церкви. Пак поломникы підут через Ізбы і Біличну. По дорозі будут затримувати ся в тамтышніх церквах. О 18.00 год. мают зайти на Святу Гору Явір. Поломництво є в памят подій з 1925 рока.