Сумар дня на 20. червця/юнія 2024 р.

Приносиме вам сумар медияльной ґрупы ЛЕМ.фм+ на ден 20. червця/юнія 2024 р.

Нове выданя творів Духновича

В 2023 р. припоминали сме 220 років од дня народжыня русиньского будителя, Александра Духновича. З той нагоды Театр Александра Духновича в Пряшові на сцені запрезентувал першый раз по русиньскы його пєсу «Головный Тарабанщык». Валерий Падяк вдяка підпорі Русинів на Мадярах выдал збірник Духновичовых творів під назвом «Моя ліра и кимвал». Зас перед парома тыжнями вказала ся книжка «Александер Духнович. Творы», котру упорядкувал Валерий Падяк вєдно з Михалом Павличом. Публикация не є дуплікатом попередньой, котру склал Падяк. Має веце унікатів, котры дістали ся перед чытателя першыраз. Презентацию мала публикация лем недавно, 10. червця/юнія в Пряшові і выкликала жыву дискусию. Выданя чыслит 400 сторін. Книжка є при тым богата в ілюстрациі ци сканы історичных выдань, Валерий Падяк вдяка своій долгорічній дослідничій роботі уточнює і біоґрафію Духновича.

Церков з Реґєтовова потрібує помочы

Православна церков св. Михала Архангела в Реґєтові потрібує нашой фінансовой помочы. Як інформує, выникла потреба фінансовой підпоры проєкту посвяченого консерваторскым працам при дакотрых іконах з ікостасу реґєтівского храму. Парохія в текучым році отримала дофінансуваня з Міністерства Культуры і Нацийональной Спадковины в высокости 55 тис. на консервацию ікон, якы ждут скорой помочу перед деґрадацийом. То праздничны іконы, iкона Ісуса Христа Пантократора і Tайной Вечері. До запертя буджету реґетівскым вірным бракує 11 тис. зл, што є рівножавне тзв. власному вкладови парахіі. В припаді, коли такых грошів не поведе ся зобрати, парохія буде змушена звернути цілу квоту отриманой дотациі. Церков потрібує іщы 4 тис. зл на покрытя коштів ремонту елевациі. Кєд мате дяку помочы – мож тото зробити за посередництвом сайту zrzutka.pl.

Фестіваль хорів в Пряшові

В вікенд од 14. до 16. червця/юнія в пряшівскім грекокатолицкым соборі святого Йоана Крестителя проходил 33. річник Фестівалю духовных пісен візантийского обряду. Фестіваль проходил з благословліня митрополиты Йоны Максима, пряшівского архієпископа. Был одкрытый в пятницю архієрейском літургійом, вчас котрой співал грекокатолицкій хор Стаурос з парохіі Пряшів-Секчов. Головный проґрам – фестівальовый концерт, проходил в суботу. Як першый выступил домашній хор св. Йоана Крестителя. Тот своім репертуаром припомнул 105. річницю народжыня русиньского композитора і хормайстра Юрия Цимборы. Дальше выступували другы запрошены хоры. На кінци концерту зазвучало Буди імя Господне од Димитрия Бортнянського. Тоту літургічну част заспівали разом члены вшыткых хорів.

ПСК помагат русиньскым селам

Як інформувало словацкє Одділіня Комунікациі Пряшівского Самосправного Краю (ПСК), до гуманітарной помочы для родин, котры постигли недавны зливы в окресі Снина, залучат ся і пряшівска крайска самосправа. Поміч іде конкретно до русиньскых сел Вубля і Михайлчов, де промптно поможе ся штирьом жадателям. Розділило ся про них близко 6 тис. евро. Минулотыжньовый дойдж в окресі Снина залял більше хыж, так само студні і запхал канализацию. Шкоды на маєтку рахуют і родины зо сел Вубля і Михайльов. Фінансова поміч іде для трьох родин з Вубли, і єдного жадателя з села Михайльов.