Сумар дня на 20. квітня/апріля 2022 р.

Приносиме вам сумар медияльной ґрупы ЛЕМ.фм+ на ден 14. квітня/апріля 2022 р.

Священникы проти Кірилови

Ґрупа коло 200 священників Украіньской Православной Церкви будучой в структурах Московского Патріархату думат, што патріарха московскій і цілой Руси Кірил повинен станути перед «медженародным церковным трибуналом». В одкрытым писмі оголошеным 11. квітня/апріля до голов локальных православных церкви зажадали тіж ясно і єднозначно осудити аґресию Росийской Федерациі проти Украіні. Авторы писма высунули під адресом патріaрхы два серіозны обвиніня: што голосит він доктрину «руского миру», котра в іх опініі не одповідат науці православя і винна быти осуджена як герезия, та што патріарха одповідат за моральный злочын – благословил войну проти Украіні і дає полну підпору для аґресивных діянь росийскых войск на териториі Украіны. Діяня патріархы выкликуют масове обуріня серед духовенства і вірных УПЦ, уж тепер што найменше 15 єпархій перестало офіцийні выміняти мено Кірила вчас богослужынь, а чысло тото ся звекшат.

Еміль Каня мастером загыбаючой професиі – каміняркы

Музей Дворы Карвациянів і Ґладышів в Ґорлицях єст бенефіциєнтом проґраму Мастер Традициі фінансуваного Міністром Культуры і Нацийональной Спадковины на реализацию проєкту пн. «Мастер Трацициі – Еміль Каня». Вшыткы охочы навчыти ся загыбаючой уж камінярской професиі можут до 29. квітня/апріля записувати ся до участи в тым проєкті. Спомненый Еміль Каня, якій од років жыє в Бортным, головным камінярскым осередку Лемковины, буде інструктором і проведе серию варштатів наукы каміняркы. Цілю проєкту є навчыти дорослы особы, як выглядало традицийне ремесло Лемковины і Погіря звязане з обробком каменя. Бортняньскы каміняре і іх выробы были перед роками знаны на цілу околицю. Дотепер перетырвала част придорожных крестів ци памятників на цмонтерях спід бортняньского долота. Записы і дрібницьовы інформациі в Скансені Погіряньского Села в Шымбарку.

Для біженців можливіст посвячыня кошыків на місци розлокуваня

Oтец прот. Роман Дубец Секретар Єпархіяльной Канцеляриі Православного Архієпископа Перемышльского і Ґорлицкого подал інформацию, што в звязку з фактом, што ближат ся великодні свята за юлияньскым календарьом, а серед біженців з Украіны векшіст деклярує ся як православны, Польска Автокефальна Православна Церков старат ся духовом опіком обняти як найвеце осіб і зато є можливіст, жебы священникы доіхали до зорґанізуваных ґруп в місци іх розлокуваня, котры не можут самы доіхати до церкви на обшыри єпархіі, жебы спільні ся помолити і посвятити кошыкы. На обшыр Ґорлиці/Ясло комунікувати мож ся з о. Романом Дубецом, на обшыр Крениця/Новый Санч з о. Петром Пупчыком, а на обшыр Ряшів/Тарнів з о. Дариюшом Бойчыком. Вшыткы духовны знают украіньскій язык.

Ліпшы і гіршы

Днес о 17.00 год. проходит онляйнова дебата пн. «Ліпшы і гіршы. Нерівне трактуваня біженців в Польщы». Орґанізатором бесіды є Комісия дс. Рівного Трактуваня діюча при Начальній Адвокатскій Раді. Вчас стрічы будут бесідувати про зріжницюваный підхід в Польщы до біженців в залежности од іх походжыня, етнічной приналежности та місця перекрачаня границі. В дебаті участ возмут адвокаты, активісты, специялисты дс. прав чловека і рівного трактуваня. Трансмітувана буде на каналі Польской Адвокатуры в сервісі YouTube та на фейсбуковым профіли Начальной Адвокатской Рады. Дрібниці найдете на сайті adwokatura.pl.