Сумар дня на 20. листопада/новембра 2024 р.

Приносиме вам сумар медияльной ґрупы ЛЕМ.фм+ на ден 20. листопада/новембра 2024 р.

Засіданя Урядовых Представників Спільной Комісиі Уряду та Нацийональных і Етнічных Меншын з Польском Екуменічном Радом

В понедільок 18. листопада/новембра в Міністерстві Внутрішніх Справ і Адміністрациі одбыло ся засіданя Урядовых Представників Спільной Комісиі Уряду та Нацийональных і Етнічных Меншын з Польском Екуменічном Радом. Спілведучыма засіданя были віцеміністер Томаш Шыманьскій та єпископ Анджей Маліцкій, суперінтендант Євангелицкой Церкви Методистичной, презес Польской Екуменічной Рады. Вчас засіданя омовлено квестиі звязаны з вчыньом реліґіі в школах. Церковна страна представила своє становиско. Участникы стрічы дискутивали тіж над квестиями звязаныма з Церковным Фундушом. Урядова страна підкрислиля, што залежыт єй на конструктивным діалоґу, жебы выпрацувати спільне становиско што до пропонуваного нормативного змісту. З церковной страны присутны были м.ін. в заступстві митрополиты Савы – архієпископ Авель, ординарий православной холмско-люблиньской єпархіі, архієпископ Юрий, ординарий православной вроцлавско-щеціньской єпархіі, православный ординарий Польского Войска, ректор Християньской Теолоґічной Академіі, єпископ Пшемыслав Семко Короза, голова Євангелицко-Реформованой Церкви в Польщы ци о. Марек Ґлодек, ведучый Рады Церкви Християн Баптистів в Польщы.

Темы операциі «Вісла» та звороту лемківскы лісів

Днес о 16.00 год. в будинку Сойму в Варшаві одбыват ся засіданя Соймовой Комісиі Нацийональных і Етнічных Меншын, якє буде тыкало лемківскых справ. Можливе єст онляйнове прислухуваня ся бесідам. В порядку засіданя єст розсмотріти інформацию Презеса Інституту Нацийональной Памяти на тему выгашыня досліджыня в справі акциі «Вісла» та розсмотріти інформацию Міністра Климати і Середовиска односно становиска Державных Лісів в проходячых судовых посупуванях о зворот нерухомости (лісів) перенятых через Скарб Державы по выселінях лемківской соспільности в рамках акциі «Вісла». Прислухувати ся засіданю мож через реляцию нажыво, што поміщена на соймовым вебсайті: www.sejm.gov.pl. Початок о 16.00 год.

Што з обводницьом Ґорлиц?

Перед тыжньом в Маршалківскым Уряді в Кракові одбыла ся чергова стріча в справі західньой обводници Ґорлиц по воєвідскій дорозі но 977. З маршалком воєвідства стрітили ся м.ін. бургомайстер Ґорлиц Рафал Кукля, ґорлицкій староста Мирослав Вальонґ, війтове ґмін Ґорлиці і Санкова, та посланкыня Барбара Бартусь ци Ядвіґа Войтович з Соймику Воєвідства. Бугромайстер Ґорлиц Рафал Кукля подал, што в оціні специялистів сеса обводниця єст найважнійшом комунікацийном інвестицийом на обшыри міста. Вєдно піднято рішыня о продолжаню проєктовых робіт, жебы выпрацувати найбарже оптимальне розвязаня, котре поможе одтяжыти закоркуваный центр міста.

Выстава соспільно-політичного плякату в Польковицях

До кінця листопада/новембра в будинку Повітового Староства в Польковицях мож обзерати выставу соспільно-політичного плякату. Презентуваны в старостві плякаты были зроблены на потербы 9. едициі Медженародного Бієнале Соспільно-Політичного Плякату «Творчо для прав чловека», в котрым взяло участ 274 артистів з цілого світа, до конкурсу зголошено понад 600 плякатів. Найліпшых 80 презентуваных є в рамках выставы. Артистичны голосы тыкают толеранциі, еколоґіі, рівности, расизму, влияня політикы на жытя громадян, насильства, недотримуваня прав діти, жен і меншын. Бієнале Соспільно-Політичного Плякату, котрого орґанізатором єст Медженародный Дім Стріч Молодежы в Освєнцімі, єст акутальні єдным з найбарже розпознавальных осередків польского плякату.