Сумар дня на 20. жолтня/октобра 2021 р.

Приносиме вам сумар медияльной ґрупы ЛЕМ.фм+ на ден 20. жолтня/октобра 2021 р.

Ґміна Санкова найвысше в ранкінґу

Ґміна Санкова заняла перше місце в ранкінґу Оціны Активности Ґмін Сандецкого Субреґіону за 2020 рік. Бадачы з Економічного Інституту Высшой Державной Професийной Школы в Новым Санчы оцінили 39 самоурядів нашого реґіону вказуючы на лідерів в пятьох модулах, а то ґенеруваня доходів, позаінвестицийна економічна діяльніст, інвестицийна активніст ґміны, ефекты соспільной політикы та динаміка. Найвеце пунктів здобыла ґміна Санкова, нагороду одобрала війт ґміны Малґожата Малух. Ґміна Устя Рускє нашла ся двакратні на другым місци в зоставлінях при оціні модулів ефектів соспільной політикы і динамікы. В модулі позаінвестицийна економічна діяльніст на другым і третім місци были одповідньо ґміна Мушына і Крениця. Орґанізатором Оціны Активности Ґмін Сандецкого Субреґіону єст Сандецка Фундация.

Фуміґация в церкви в Щавным

Того тыжня є выняткова нагода, жебы видіти православну церков в селі Щавне не з зеленым дахом і бронзовыма дошками, а цілу білу, а што веце, то детальні оклиєну специяльном фолійом. Од суботы, 16. жолтня/октобра, зачали вести процес фуміґациі, храм буде недоступный до звиджаня тыжден. Фуміґация, інакше ґазуваня, є то нищыня шкідників хімікалиями званыма фуміґантами. Церков в Щавным є першом на загал лемківском церквом, яка переходит тот процес, а другом кєд іде о церкви на обшыри Підкарпатского Воєвідства. В 2018 році фуміґацию провели в церкви в Хотинци. Церков Успінія Пресвятой Богородиці в Щавным од 2015 рока є парохіяльном церквом, з парохом о. Юлияном Феленчаком, скорше, од 1962 рока была дочырньом церквом Православной Парохіі в Морохові, а до выселінь была грекокатолицком святыньом.

Зреконструували малый каштель в Снині

Місто Снина закінчыло реконструкцию так званого малого каштеля з ХІХ ст., єдной зо штырьох нацийональных культурных памяток в історичным ареалі міста. Окрем Дому Служебництва, як тот обєкт є евідуваный Памятниковым Урядом Словацкой Республикы, ревітализувана была і част історичного парку будучого в сусідстві будинку. Выникнула гын одпочынкова зона з озером. В зреконструуваній будові самосправа хоче реализувати м.ін. творчы варштаты для діти, в пивничных просторах мают ся презентувати локальны продукты. Реконструкция тырвала рік, а была можлива завдякы проєктови черезграничной спілпрацы проґраму Европейскій Інструмент Сусідства, в котрым Снина має за партнера підкарпатскє місто Хуст. В рамках проєкту одновили і озеро, якє было зроблене в ХІХ ст., а зліквідуване вчас комуністичного режіму, побудували альтанку і пару ходників.

ПГА на поміч міґрантам

В звязку з послідніма подіями і фурт погіршаючом ся гуманітарном ситуацийом на польско-білорускій граници Польска Гуманітарна Акция урухомила грошову колекту на поміч міґрантам. За зобраны грошы куплят м.ін. ідло, облечыня, коцы ци термосы. Даны до переводу находят ся сайті www.pah.org.pl.