Сумар дня на 21. червця/юнія 2024 р.

Приносиме вам сумар медияльной ґрупы ЛЕМ.фм+ на ден 21. червця/юнія 2024 р.

LXXXIII пленарне засіданя СКУтНіЕМ

В понедільок 1. липця/юлия одбуде ся 83. пленарне засіданя Спільной Комісиі Уряду та Нацийональных і Етнічных Меншын. Єдном з підниманых тем буде меншынова освіта – кючовы постуляты нацийоналных і етнічных меншын. В рамках Спільной Комісиі буде покликаный ансамбль до справ едукациі і окрислены будут його задачы. Інчом важном темом порушаном на засіданю буде меншынове фінансуваня. Подана буде інформация о плянуваній высокости середків на реализацию задач, маючых на ціли охорону, захованя і розвиток культуровой достоменности нацийональных і етнічных меншын та захованя і розвиток реґіонального языка на 2025 рік та можливости звекшыня тых середків в текучым році. Так само будут пояснены правила признаваня реченых дотаций Міністерством Внутрішніх Справ і Андміністрациі на 2025 р. і принципы реализациі тых задач. Комісия буде дискутувала і другы темы, примірно про нацийональный проґрам безпекы «Щыт Схід», маючый на ціли зміцніня східньой границі, і його значыня для нацийональных і етнічных меншын.

Полномічнуй Нижньошлезского Воєводы стрітит ся з представниками меншын

В четвер 11. липця/юлия в Нижньошлезскым Воєвідскым Уряді во Вровлаві одбуде ся стріча Полномічного Нижньошлезского Воєводы до спрац Нацийональных і Етнічных меншын з орґанізациями, фундушами і стоваришынями репрезентуючыма меншыны. Полномічный Войцєх Скшыпчык запросил на стрічу вшыткых представників орґанізаций зосереджаючых нацийональны і етнічны меншыны, як тіж стоваришынь і фундаций діючых на обшыри Нижнього Шлеска. Як пише в запрошыню, Нижній Шлеск єст красным реґіоном, в котрым переникают ся традициі ріжных культур і соспільности. На стрічы полномічный хотіл бы побесідувати о потребах меншыновых орґанізаций і спілпрацы, так жебы мочы вєдно діяти для репрезентуваных меншын.

Джерела воды до питя в русиньскых селах

В русиньскых селах сниньского окресу потвердили джерела воды до питя. Послідні три рокы были там ведены гыдроґеолоґічны баданя. Пряшівскій Самосправный Край (ПСК) выконал од 2021 р. понад 30 верчынь, котрых результаты творят фундамент про зробліня проєктовой документациі. Як подал председа ПСК Мілян Маєрскій, з 24 сел окресу Снина, котры сут частьом проєкту, было потверджене джерело воды до питя в 19, што поважуют в даным гыдроґеолоґічным оточыню західньой Словациі за величезный успіх. За пряшівскым жупанон, такым ділом знат крайска самоспава помочы понад 5000 жытелям териториі, котры хоц жыют близко водного резервуару Старина, то дотепер не мают воды до питя. Веце про забезпечыня водоводу і канализациі в окресі Снина прочытате на нашым портали.

Лемківскій Пікнік в Америці

Уж в тоту неділю, 23. червця/юнія в америцкым селі Гартсдейль близко Йонкерсу пройде дальша едиция «Лемківского Пікніку». Карпаторусиньскій Центр «Лемко Голь» орґанізує подію каждого рока близко Русаля, так же єст она принимана через участників як «русальный» пікнік. Пікнік лемківской еміґрациі на східнім берегу ЗША то за каждым разом нагода на стрічу родаків з Йонкерсу, Ню Йорка і інчых меньшых місцевости. Сеса подія то єдна з головных, якы протягом рока орґанізує «Лемко Голь». В проґрамі окрем доброй атмосферы і лемківской музикы є тіж буфет полный ідла і напитків. Деталів глядайте в орґанізаторів.