Сумар дня на 21. липця/юлия 2023 р.

Приносиме вам сумар медияльной ґрупы ЛЕМ.фм+ на ден 21. липця/юлия 2023 р.

В траґічным выпадку в Ліґници згынула Александа Цимбаляк

З жальом інформуєме, што в середу 19. липця/юлия траґічно згынула в Ліґници 21-річна Лемкыня Александа Цимбаляк. Як подал Лемківскій Ансамбль і Пісні і Танця «Кычера», Ксандра од дітины была членкыньом Кычеркы, а пак вельо років гуляла в ансамблю Кычера. Разом з братом Павлом помагали як пілоты при орґанізациі фестівалю «Світ під Кычером». Днес о 18.00 год. в православній церкви в Ліґници одбуде ся парастас. Похоронны богослужыня пройдут в тым самым місци в суботу о 9.00 год. Вічна памят!

«Оддайте язык дітям»

Німецка меншына фурт протестує проти ограничыню вчыня менышнового німецкого языка. Меншына зачала більбордову акцию пн. «Оддайте язык дітям», в спаві приверніня фінансуваня державом трьох лекций тыжньово наукы німецкого языка як материньского. В минулым році ресорт едукациі рішыл ограничыти фінансуваня тых занять. Припомнийме, што розпоряджыня Міністра Едукациі і Наукы Пшемыслава Чарнка зменшыло од вересня/септембра минулого рока вымір вчыня німецкого як языка меншыны з трьох годин до єдной. Было то безпосередньо спричынене рішыньом Сойму зменшыти середкы на вчыня меншыновых языків о близко 40 млн злотых.

Музей в Ужгороді здобыл цінный рукопус Кароя Мейсароша

Вчера, 20. липця/юлия, в ден 202. річниці народжыня вызначного історика, якого робота є повязанa з Ужгородом і Русинами, Кароя Мейсароша, Закарпатскій Областный Краєзнавчый Музей ім. Тіводара Легоцкого в Ужгороді здобыл цінный рукопис. Рукопис історика в мадярскым языку передал для музею правнук Михаіл Фединишынец, в експозициі пн. «Кабінет Кароя Мейсароша – першого історика Ужгорода ХІХ столітя». Як подал музей, іде о обявленый рукопис пн. «Первістне походжыня і ріжны типы земель на Мадярах до введіня урбарюм; законы і єднотны правила, котры ся іх дотуляют». Тото наукове досліджыня здобыло нагороду Імператорского Кральовочо Наукового Університету в Пешті в 1859 р. Карой Мейсарош родил ся в місті Гайдудороґ на Мадярах в 1821 р. В 1859 зачал роботу правника в Ужгороді, де ся заінтересувал вопросом Русинів. Мейсарош є автором 26 книг і понад 800 статій. Окрем інчых опубликувал історичну книгу пн. «Істория угорскых Русинів», в котрій ся пише, же Русины сут автохнонным населіньом того реґіону, і як такє населіня мают мати своі права. Веце про Кароя Мейсароша можете чытати в дописі на нашым портали.

Екомузей «На выпалі»

В Радошыцях коло Команчы одкрыли Екомузей рослинного угля «На выпалі». В музею одтвореный є процес перерабляня дерева на угель. Не єст то типовый скансен, діє гев ґратя до выпаляня, котре обслугує угляр з 40-літнім стажом Збишек Бальцежак. В музею находит ся тіж м.ін ґалерия фотоґрафій старых выпалань і углярів, а огороджыньом сут купы дерева, так званых «метрівок». Єст і ґастрономічна зона, в котрій буде мож попрібувати стравы зрыхтуваны як раз на деревным углю. Екомузей был одкрытый Фундацийом «Рамено в рамено над Ославом».