Сумар дня на 21. листопада/новембра 2022 р.

Приносиме вам сумар медияльной ґрупы ЛЕМ.фм+ на ден 21. листопада/новембра 2022 р.

Творы Енді Варголя цілю климатичных активістів

Дальшый атак климатичных активістів на твір Енді Варголя. Близко два тыжні тому інформували сме о атаку двох активісток на образы з сериі «Поливкы Campbell’s» Енді Варголя в Нацийональній Ґалериі Австралиі. Подля активістів творы Варголя мали представляти розшалілый консумпцийонізм. Подібны атакы были і в другых світовых ґалериях штукы – в Лондоні, Газі, Римі ци Потсдамі. Цілю активістів были образы Монета, ван Ґоґа, Вермера, але і примірно восковы фіґуры в Мадам Тюссо. Щестливі вызначны творы штукы в більшости сут забезпечены шыбом, і зато не были знищены. Не тыкат тото різб і інсталяций, котры часто не сут ничым закрыты. Тым разом італияньскы климатичны активісты з ґрупы Ultima Generazione (Остатнє Поколіня) обсыпали муком спортове авто BMW M1 помалюване Енді Варгольом, выекспонуване в ґалериі Fabbrica del Vapore в Міляні. По тым як обсыпали авто, активісты приклиіли ся до підлогы ґалериі. Єдна з активісток крикнула, што твір Варголя є символичный для незрівноваженой консумпциі ресурсів плянеты.

Результаты меншыновых выборів в Сербіі

13. листопада/новембра тр. в Сербіі проходили меншыновы выборы. Нацийональны меншыны, в тым Русины, выберали в них новый склад своіх нацийональных совітів. 17. листопада/новембра были опубликуваны результаты выборів. Як подала аґентура Рутенпрес, подля офіцияльных документів в списку русиньской нацийональной меншыны было записаных 7 247 осіб з правом голосувати. В голосуваню взяло участ 3 627 осіб, значыт близко 50%. Русины голосували довєдна в 188 місцях. До Нацийонального Совіту Русинів, орґану русиньской нацийональной самосправы, кандидувало в тым році пят списків. Вшыткы здобыли мандаты. В выборах зас перемогли Русины Вєдно – список буде мал 10 мандатів. Другє місце в выборах мал список Руска Матка за Русинів, котрый підняла членьска орґанізация Світового Конґресу Русинів – Руска Матка. Список, якого лідером є проф. Михайло Фейса, буде в совіті з трьома мандатами. По два мандаты здобыли спискы Вєдно за Войводину – ОЛЕНА ПАПУҐА, Русиньска будучніст і За Русинів – Желько Ковач. Більше про результаты выборів найдете в дописі на нашым портали.

«Вечеры з психолоґійом» в Рускій Бурсі в Ґорлицях

Фундация «Auxilium» римокатолицкой Тарнівской Єпархіі і Душпастырство Родин Ряшівской Єпархіі орґанізує в Ґорлицях цикль дармовых стіч для супружеств, родичів, опікунів, учытелів і другых заінтересуваных темом чловека і його фунґуваня в ріжных социяльных ґрупах. «Вечеры з психолоґійом» будут проходити в нашій Рускій Бурсі в Ґорлицях, при ул. Генрика Сєнкєвича 28. В часі стріч зо специялистами – психолоґами, будут порушаны темы тыкаючы супружества, родины, выхованя діти і раджыня собі з трудностями, якы выкликуют зміны в окружаючій нас реальности. Перша стріча уж заран о 17.00 год. в Рускій Бурсі в Ґорлицях.

Посліднє «Карпатскє Слуховиско»

Уж в тоту середу, 23. листопада/новембра, одбуде ся послідній з циклю онляйновых выкладів орґанізуваных Реґіональным Інститутом пн. «Карпатскы Слуховиска». Дотля темы стріч тыкали обрядовости, кухні, вірінь і леґенд, рослин в придомашніх загородах, музикы і інструментів, архітектуры, традицийных орнаментів і облечыня Бойків і Лемків. Посліднє слуховиско пн. «Штоденне жытя Бойків і Лемків» одбуде ся в середу о 17.00 год. на плятформі Zoom. Выклад вела буде Мирослава Копыстяньска, др гуманістичных наук, яка од 2014 р. репрезентує лемківску меншыну в Спільній Комісиі Уряду та Нацийональных і Етнічных Меншын. Мотузок до стрічы мож найти на інтернетовым сайті Реґіонального Інституту. Кєд дахто хоче одслухати награня з попередніх выкладів, фурт може іх найти на каналі YouTube Фундациі Реґіональный Інститут.