Сумар дня на 21. листопада/новембра 2023 р.

Приносиме вам сумар медияльной ґрупы ЛЕМ.фм+ на ден 21. листопада/новембра 2023 р.

Стріча Стоваришыня Копальничых Ґмін

В минулым тыжни в польковицкым ратушы засідали члены Стоваришыня Копальничых Ґмін в Польщы. Ґміна Польковиці до стоваришыня приступила в 2020 р., а того рока першый раз мала чест орґанізувати стрічу. Як повіл бургомайстер Польковиц, Лукаш Пузнєцкій, то великє выріжніня для цілой ґміны. Подія зачала ся од звиджаня копальні «Рудна» Пілнічна, а пак одбыла ся дискусия в ратушы. В часі стрічы присутны бесідували м.ін. о реформі копальничого права, охороні середовиска і дальшых діянях для поправы і розвитку самоурядів, де находят ся копальні. Явила ся тіж тема закрытя даякых копален і проблемів, якы ся з тым вяжут дла ґмін. В часі засіданя принято тіж схваліня о приступліню Стоваришыня до Польского Смоґового Алярму, бесідувано о буджеті на будучый рік і ближучый ся ювілей орґанізациі.

В околицях села Вільхівец пострілено волка

В неділю 19. листопада/новембра в околицях села Вільхівец – коросняньскій повіт – при граници з Маґурскым Нацийональным Парком, пострілено волка. Ситуация была удокументувана працівником Парку, в часі коли перевоженый был постріленый волк, і зголошена на поліцию. Як передал представник коросняньской поліциі, в справі затримали єдну особу, не єст то стріляючый, але тот, хто транспортувал волка з ліса. Додатково поліция забезпечыла волче тіле до бадань. Представник поліциі підкрислил, што досліджыня уж ся зачало, особливо важне єст окрислити, хто забил волка, ци то было в часі полюваня, а кєд так, то ци было оно зголошене. Припоминаме, што од 1998 р. в Польщы волкы сут обняты ґатунковом охороном – не мож на них полювати, ани іх імати, за недотримуваня переписів горозит кара позбавліня свободы до 5 років.

Репортаж учеників з Ґладышова о Александрі Вислоцкій нагородженый в конкурсі «Польскы Ексцентрикы»

Орґанізация Terra Desolata оголосила результаты конкурсу «Польскы Ексцентрикы – варштаты о незвычайных Поляках забытых через час». Конкурс направленый был на учеників кляс 3-6 основных шків. Задачом было найти і оповісти о локальным герою-артисті, науковцю, подорожныку або інчій персоні, котру мож назвати ексцентриком – тзн. о кымси, хто своім діяньом причынил ся до змін в найблизшым середовиску. До конкурсу зголосили ся ученикы 5 клясы основной Школы ім. Александры Вислоцкой в Ґладышові, котры написали короткій репортаж о патронці свойой школы – лемківскій діячці і учытельці. Як подала конкурсова капітула, серед многых зголошынь глядали такых, котрых не найде ся в підручниках, але вартат о них знати, хоцкі тяжко было ім выбрати – выріжнили 9 прац, в тым репортаж учеників з Ґладышова. Працу о Александрі Вислоцкій мож прочытати на сайті орґанізациі. Ґратулюєме.

«Другє жытя дерева» – нова атракция в Высовій

Надлісництво Лося поінформувало, што вздолж лісовой дорогы з Бліхнаркы до Высовой одкрыли природничо-едукацийну стежку «Другє жытя дерева». Думка зродила ся при інвентаризациі дерев вздолж выміненой дорогы, де вказало ся, што даякы з них сут мертвы і становлят загорозу для одвиджаючых тото місце туристів і жытелів околиц. Дерева єднак дало ся выкорыстати в креативный спосіб як материял для Анджея Андре Завадзкого, котрый зробил з ных різбы звірят – совы, медведя і підорлика малого. До готовых прац Надлісництво додало інформацийны таблиці о вырізбленых звірятах і лавкы.