Сумар дня на 21. мая 2026 р.

Приносиме вам сумар медияльной ґрупы ЛЕМ.фм+ на ден 21. мая 2026 р.

13. РутенАле

Уж позаране зачне ся РутенАле – 13. Медженародне Бієнале Лемківской / Русиньской Культуры, котрого першый ден буде в суботу, 23. мая в Креници, а другій неділю 24. мая в Высовій. На Бієнале все презентуют ся лемкіскы/русиньскы творці з Польшы і заграниці. Доднес Бієнале гостило творців з 11 держав. Того рока выступлят русиньскы артисты з: Польщы, Словациі, Украіны, Румуніі, Мадяр, Хорвациі і Сербіі. На початку, в суботу рано, пройде засіданя Світовой Рады Русинів. Пак в само полудне на старым креницкым цмонтери одправлена буде панахіда на гробі Епіфана Дровняка – Никыфоря. Дальше зложене буде квітя під памятником артисты на Бульварах Дітля. Одтамале перейде хоровід до Старого Здравичного Дому на Креницкым Дептаку, де о 15:00 год. в бальовій сали одкрыты будут выставы малюнку, ікон і фотоґрафій. В бальовій сали пройдут і два концерты – о 15:30 і 19.00. Другій ден Бієнале зачне ся в неділю о год. 13:30 зложыньом квітя при памятнику в Устю Рускым. Пак подія перенесе ся до амфітеатру в Высовій, де о год. 14:30 буде мож выслухати прелекцию о русиньскій культурі. О 15:00 год. одбуде ся там фіналовый концерт. Вступне на вшыткы подіі дармо.

На ліґницку церков вернул крест

13. мая на баню грекокатолицкой церкви Успіня Пресвятой Богородиці в Ліґници вернул крест. Вісем місяців тому был він вкраденый і знищеный через, днес уж покараного, злодія. Припомнийме, што метальовый крест был вкраденый 13. вересня/септембра 2025 р., а подальше знищеный, потятый на кавальці. Злодій был неодолга затриманый і поставленый перед ліґницком судом. Подля того, што гварил, не был мотивуваный взглядами нацийональной ци реліґійной ненависти. 10. мая новый крест був посвяченый, а три дни пізнійше поставленый на головній бані ліґницкого храму.

Неодолга початок Русиньского Фестівалю во Свиднику

Уж в найблизшый понедільок зачне ся 14. річник Фестівалю Культуры Русиинів Словациі – Русиньскій Фестіваль, котрого головным орґанізатором є Окресна Орґанізация Русиньской Оброды в Свиднику. Фестіваль потырват цілый тыжден. В понедільок 25. мая в Піддукляньскым Освітнім Центрі пройде одкрытя фестівалю, котрому буде товаришыл выклад о перлинах Карпат. В віторок в Домі Культуры акторы Театру Александра Духновича вкажут пєсу з назвом «Полепетко». В середу в Піддукляньскій Бібліотеці Інститут Русиньского Языка і Культуры Пряшівского Універистету просит на бесіду о русиністиці в школі. В четвер буде 11. Фестіваль Віры, в рамках котрого одправлена буде грекокатолицка св. Літургія в русиньскым языку. В пятницю зачне ся головна част фестівалю – в свидницкым амфітеатрі, і потырват до неділі. В проґрамі на пятницю єст м.ін. 7. річник Фестівалю Орфеус – музичной переглядкы авторской русиньской творчости і выступы фольклорных колективів. В суботу запрезентує ся м.ін. ПУЛьС з Пряшова – єдиный в світі професийный русиньскій ансамбль. В послідній ден подіі запрезенуют ся домашні ансамблі і гості. Фурт іщы можете придбати онляйн 3-дньовы білеты вступу.

Ремонт улиці 3 Мая в Ґорлицях

Ґорлицка улиця 3 Мая буде ревітализувана. Як інформує місто – рыхтуваня до ремонту вошли в дальшый етап. Початок модернізациі плянуваный єст на другу половину того рока, по допрецизуваню технічного пляну і зробліню розпискы прац. Інвестиция буде ведена постепенно, так штобы не робити проблемів в руху для жытелів і підприємців. В першым етапі буде выміна канализациі. Протягом цілого ремонту цільом міста єст тримати нормальный рух на улици 3 Мая, жебы не была она ограничена для люди. Деталі новой орґанізациі руху та розписка плянуваных робіт будут публикуваны по завершыню вшыткых проєктовых прац.