Приносиме Вам сумар медияльной ґрупы ЛЕМ.фм на ден 21. серпня/авґуста 2019 р.
Кычера высоко оцінена
Лемківскій Ансамбль Пісні і Танця «Кычера» з Ліґниці під конец липця/юлия тр. взял участ в ювіленыйм, 50. Фестівали Фольклору Польскых Ґуралів в Жывци. Колектив тым разом был трикрактно нагородженый в конкурсовій части фестівалю. Єдно з оцінінь было признане для ансамблю за выставліня видовиска. Кычера запрезенувала ся з обрядом – лемківскым весільом. Окрем Кычеры выступило 26 інчых фольклорных ґруп з цільой Польщы. Співакы з Кычеры заняли тіж найвысше місце в катеґориі співочых ансамблів. На такым самым рівни жырі оцінило і другу ґрупу – Маґужанкы з Лодиґовиц. Другє місце по рівно припало жіночій части Кычеры і двом інчым ґрупам. Додатково, жырі жывєцкого фестівалю вытипувало штырі ансамблі, серед них і Кычеру, котры репрезентуют Польщу на 51. Фестівали Фольклору Гірскых Земель в Закопаным, якій є вызнаный єдным з найважнійшых гірскых фестівалів во світі. Реченый Фестіваль тырват до 24. серпня/авґуста.
Першы туристы на стежці в коронах дерев Крениці
В понедільок, 19. серпня/авґуста, першы туристы мали нагоду перейти ся проведеном в коронах дерев стежком на видокову вежу в Креници. Тоту вознесено на выжній стациі лыжного осередка Солотвины Арена на высокости близко 900 метрів в пасмі Креницкой Яворины. Сама вежа єст высока на близко 50 метрів. На трасі розставлены сут інтерактивны таблиці про місцевы рослины, звірята, ґеолоґію і не лем. Плянує ся, же обєкт буде доступный протягом цілого рока.
«Хто сідит на міди»?
О тыжден, 31. серпня/авґуста, пройде 7. Ліґницкій Фестіваль Культур пн. «Хто сідит на міди». Вчас тогорічной едициі подіі запрезентуют ся м.ін. польскы рееміґранты з Босні, Буковины, Німці, Ромы, Полякы з Кресів і очывидні Лемкы. Русиньскы танці і звыкы вкаже ансамбль Кычера. Окрем презентациі співочо-танцювальной культуры меншын з ліґницко-ґлоґівскго реґіону, на фестівали буде мож попрібувати ідло типове для даных ґруп ци взяти участ в варштатах загыбаючых професий. Цілю подіі є інтеґрувати соспільство, вызбывати ся стереотипів та плекати свою культуру і зміцнювати нацийональну достоменніст. Вступне на фестіваль – дармо.
Нацийональны меншыны на змаганах в футболи
32 команды, репрезентуючы автохтонны нацийональны меншыны з цілой Европы, будут змагати ся в чемпіонаті Европы в футболи нацийональных меншын EUROPEADA 2020. Змаганя пройдут в липци/юлию, а ґаздами будут Словенці з Каринтиі. Участ возмут так мужскы, як і жіночы команды. Репрезентувати будут такы меншыны як: Ладины з Італиі, Полудньовы Тирольці, Сербы з Німец, Німці з Росиі, Окситаны з Франциі ци Фризы з Німец. Члены команд сут непрофесийныма грачами. Змаганям товаришыл буде культурный проґрам, вчас котрого меншыны будут мочы ся запрезентувати. Послідня едиция змагань EUROPEADА проходила в 2016 році в Полудньовым Тироли в Італиі. Акция є нагодом, жебы меншыны спільні ся стрітили та промували серед соспільства Европы.
Коментарі