Сумар дня на 22. квітня 2026 р.

Приносиме вам сумар медияльной ґрупы ЛЕМ.фм+ на ден 21. квітня 2026 р.

Кілько лемківскых ініциятив в рамках Меценату Малопольщы

Маршалківскій Уряд Малопольского Воєвідства оголосил результаты набору в ґрантовым конкурсі «Меценат Малопольщы». Підперты будут задачы, котры подля конкурсовой комісиі збогатят культурну оферту Малопольщы, будут влияти на промоцию Малопольщы, а тіж – єдном з критерий было, што будут промувати культуру і традициі нацийональных і етнічных меншын. В сумі підперто 389 оферт на квоту 6 млн 300 тис. зл (Заряд Воєвідства звекшыл первістну пулю дофінансуваня о 300 тис. зл). 283 оферты остали без фінансуваня, в тым Стоваришыня Лемків на орґанізацию 13. Медженародного Бієнале Лемківской/Русиньской Культуры. Підпертя од Малопольщы отримали: Товариство Популяризуваня Традициі і Культуры Лемків на Фестіваль Хорів в Креници, Стоваришыня Промоциі Лемківской Творчости Серенча на реализацию проєкту «Словом і музиком» та Обєднаня Лемків на 44. Ватру. Без дофінансуваня остали іщы м.ін. Стоваришыня В себе на орґанізацию пікніку лемківской культуры, Фундация захованя спадковины і розвитку духовой і материяльной культуры Лемків Лем – Традиция і Будучніст на Стрічы з лемківском культуром і Стоваришыня Музика Світа Акорд.

Стріча з проф. Мацєйом Яновскым, Давидом Здобыляком і інче – на Маівці в Новицы

В пятницю і суботу 1. і 2. мая в Новици одбуде ся культурна Маівка. В проґрамі природнича прогулька з проф. Анджейом Хлебіцкым, якій буде оповідал о маґурскых памятках природы. О селі, вчас другой з прогульок, оповіст Матеуш Сора, а на год. 17.30 заплянувана єст авторска стріча з проф. Мацєйом Яновскым о книжці пн. «Карпаты. Оповіст о єдных горах». Другого дня одбуде ся колективне саджыня дерев, а о 15.00 год. в сельскій світлици пройде стріча з Давидом Здобыляком і його малярством – пн. «Іхати на Лемковину». В оба вечеры одбудут ся тіж концерты під адресом Новиця 9.

Одкрытя літнього сезону на Любовняньскым Замку

Уж од кінця квітня/апріля туристы будут мочы звиджати цілый комплекс Лубовняньского Замку. Першый раз од веце як 30 років удоступнены будут вшыткы части обєкту – по закінчыню шырокой реконструкциі. Торжественне одкрытя літнього сезону заплянували на найблизшу пятницю в скансесні під замком, а о два дни на самій твердини. Туристы будут мати доступ до вшыткых експозиций, обєктів і одновленых просторів, в тым до фраґментів, котры скорше не были удоступняны. Минулого рока замок пришло видіти рекордове чысло осіб – 214 тис. люди. В тым сезоні атракцийом будут тіж одреставруваны XVIII‑вічны войсковы касарні. Хоц на разі без постійной експозициі, музей заповідат в тій части специяльну несподіванку. Тогорічный сезон сходит ся з 70-літьом істнуваня Музею в Любовни.

В вікенд дальшы подіі, якы товаришат выставі «Формы присутности. Штука Карпатскых Русинів»

Припоминаме, што в тот вікенд одбудут ся дальшы подіі, якы товаришат выставі «Формы присутности. Штука Карпатскых Русинів» презентуваній в Етноґрафічным Музею в Варшаві. В неділю 26. квітня/апріля пройде стріча з Югаском Спяк, авторком єдной з робіт, што находит ся на выставі. Стріча буде получена з творчыма варштатами. Того самого дня одбуде ся іщы презентация фільму «Енді Варголь. Американьскій сон». То документ о жытю і творчости артисты в режысериі Любомира Сливкы. По сеансі одбуде ся дискусия з Михалом Шымко і Лукашом Адамскым. А в віторок 28. квітня/апріля др габ. Томаш Квока приближыт заінтересуваным історию войводиньскых Русинів, іх міґрацию до Паноніі і тото, як столітями, далеко од карпатской вітчызны, плекали свою достоменніст.