Сумар дня на 22. серпня/авґуста 2023 р.

Приносиме вам сумар медияльной ґрупы ЛЕМ.фм+ на ден 22. серпня/авґуста 2023 р.

Гармоноґрам матур 2024

Як поінформувал спілведучый Спільной Комісиі Уряду та Нацийональных і Етнічных Меншын Григорий Куприянович, матуральный еґзамін в 2024 р. зачне ся в віторок 7. мая. Підчаст усталяня терміну Центральна Еґзамінацийна Комісия взяла до увагы, же в понедільок 6. мая будучого рока для вірных Православной Церкви і другых святкуючых подля юлияньского календаря припадат другій ден свята Великодня, і першый ден матурального еґзаміну вызначыла на віторок. В першый ден матур буде проведеный писемный еґзамін з польского языка. В другій ден, 8. мая, арбітуренты будут мочы писати м.ін. розшырену матуру з лемківского языка.

VI православне поломництво зо Ждыні до Ґорлиц

Братство Православной Молодежы Перемышльско-Ґорлицкой Єпархіі просит до участи в VI пішым поломництві зо Ждыні до Ґорлиц на свято покровителя єпархіі – святого священномученика Масима Сандовича. Поломництво зачне ся в віторок 5. вересня/септембра од св. Літургіі в церкви Покровы Пресвятой Богородиці в Ждыни, де св. Максим был хрещеный. Дальше поломникы підут через Ждыню, Ґладышів, Маластівску Маґуру, Присліп, Новицю, Білянку, Шымбарк і Ропицю Польску до Ґорлиц, де о 17.00 год. в катедральній церкви буде служена всеночна. Записы до участи в поломництві сут одкрыты до 3. вересня/септембра.

Одпуст в Лютині на праздник Успінія Пресвятой Богородиці

В минулый вікенд 19. і 20. серпня/авґуста в Лютині – найвекшым путницкым місци грекокатоликів на Словациі, проходил архієпархіальный одпуст з нагоды праздника Успінія Пресвятой Богородиці. На тогорічным одпусті была припомянута і 35. річниця установліня містного храму на базиліку мінор. Духовный проґрам традицийно проходил в базилиці мінор і в місци обявліня св. Миколая на Марияньскій горі. Головным пунктом проґраму была архієрейска літургія, яку одслужыл владыка Петро Руснак, апостольскій адміністратор Пряшівской Архієпархіі і братиславскій єпарха, а вєдно служыли емеритуваный пряшівскій архієпископ і митрополита Йоан Бабяк, братиславскій помічный єпископ Мілян Лах, священникы і діяконы з вшыткых єпархій на Словациі. Більше про одпуст і річницю чытайте в дописі на нашым портали.

В Липинках і Біловежы хотят сперти лемківску меншыну

Ґміна Липинкы і оддалена од ней о 60 км Біловежа на Пряшівщыні будут партнерами. Ініцияторами спілпрацы сут словацкы радны, але ґу тій думці єднозначно припоіли ся тіж представникы з польской стороны. Як передал війт ґміны Липинкы, Чеслав Ракочы, цілю обох самоурядів єст позыскати дофінансуваня на ріжного рода локальны інвестициі. Початково обі ґміны хотіли старати ся о середкы на будову доріг в рамках проґраму Interreg, але лишыли тоту думку заміняючы єй ма спертя лемківской культуры. Як пояснил війт Липинок, то красне, што в обох ґмінах лемківска (русиньска) меншына культивує свою традицию, зато власти хотят іх сперти додатковыма середками.

Ґміна Крениця пошырює безплатну транспортову оферту

Бургомайстер Крениці Пьотр Рыба поінформувал, што в безплатній курортній комунікациі явил ся 100-особовый автобус, котрый буде курсувал 8 дни в тыжни на трасі Чорный Потік (Ґондоля) – Солотвины (PĘTLA), в годинах од 8:00 до 18:00. На його трасі не буде бічных улиц, буде ходил лем по головній комуникацийній оси міста. Дальшом зміном в найближшым часі має быти м.ін. розшыріня вікендовой комунікациі на Тылич.