Сумар дня на 22. жолтня/октобра 2024 р.

Приносиме вам сумар медияльной ґрупы ЛЕМ.фм+ на ден 22. жолтня/октобра 2024 р.

«Мати 80 років то не єст гріх»

Клюб Лікаря з Кракова просит на стрічу з ювілейного циклю Кжыштофа Мікляшевского «Мати 80 років то не єст гріх». Стріча під гослом «Моє родинне коріня» складат ся з двох части – «Лемківска хімія» і «Краківска медицина». В першій части  припомнут собі пра-прадіда головного героя, проф. др хімічных наук Емілияна Чырняньского, першого грекокатолицкого ректора Ягайлоньского Університету і праводавці університетской хіміі. Про жытя Чырняньского выклад буде мала др габ. Олена Дуць-Файфер, пак пройде прелекция біоґрафічно-документального фільму «Польскій ректор з Лемковины» в режысері Кжыштофа Кжыжановского і Кжыштофа Мікляшевского. Першу част стрічы закінчыт выступ співачкы Мариянны Железной, Русинкы зо Словациі, котра запрезентує ся в акомпаніяменті Мартіна Караша. Друга част подіі зосерджат ся на жытю і працы матери Кжыштофа, правнучкы Емілияна – доц. др медичных наук Ядвіґы Мікляшевской, першой активной лікаркы в краковскій Новій Гуті.  Стріча пройде днес о 19.00 год. в Кракові при ул. Крупничій 11а.

Оддай голос на проєкт Пьотра і Павла Ґамбалів в фіналі конкурсу Explory 2024!

Зачало ся голосуваня публикы в конкурсі для молодых інноваторів «Explory 2024». До конкурсу зголосили свій проєкт братя Ґамбалі з Пшемкова. Пьотр і Павел Ґамбалі, ученикы Комплексу Політехнічных Шкіл, в попереднім році заняли 3 місце в загальнопольскым конкурсі для молодых інноваторів «Explory 2023», тым самым перемогли понад 300 інчых проєктів. Влони до конкурсу зголосили універсальне ґратя, котрого цілю было спомочы рефлекс і тренуваня справности пальців, нп. при регабілітациі рукы. Того рока сконструували аж сімкратно барже заавансуваный проєкт, котрый дозволит бадати реакциі чловечой долони і пальців на стимулы. Новый проєкт зас довюл молодых Ґамбалів до фіналу, а тепер ждут уж лем на результаты голосуваня публикы. Каждый, хто хоче сперти хлопців і іх проєкт, може оддати свій голос на сайті орґанізатора конкурсу Explory. Мотузок гел.

Фестіваль Світ під Кычером зас нагородженый через FIDAF

Фестіваль Світ під Кычером, уж другій раз, был выріжненый як єден з найліпшых фестівалів народной культуры на світі. Нагороду признала орґанізация FIDAF (Federation of International Dance Festivals) в часі торжественной ґалі в Сінґапурі. Поза ліґницкым фестівальом цертифікат отримали іщы Медженародный Фестіваль Танця Фольк Гарбор в Ґожові Великопольскым та фестівалі з Литвы і Филипин. Конкурсова капітула при выборі лавреатів нагороды операт ся на рапортах орґанізаторів, але тіж опініях участників, котры оцінюют зрыхтуваня сцены ци лоґістику. Анализувана єст тіж атмосфера і інтеракциі в інтернеті.

Ансамбль Ластівочка выріжнеый в конкурсі «Silesia»

Ансамбль Ластівочка отримал нагороду Сойміку Нижньошлезского Воєвідства «Silesia». Цілю нагороды єст выріжніня творців, подій ци проєктів культуры, котры в особливый спосіб причыняют ся до розвитку нижньошлезской культуры, промуючы реґіон в державі і поза єй границями. Додатково творчіст выріжненых веде до динамізуваня культурального жытя і формуваня ся реґіональной достоменности. Нагороду одобрали менеджер ансамблю і презес Кружка Стоваришыня Лемків в Пшемкові Євген Габура та кєрівничка ансамблю Марта Німаш.

фот. фб Ансамбль Ластівочка – Zespół Łastiwoczka